Khliehriat, K’ Lyngkot 20: U Bah Reachingson Siangshai uba na East Jaiñtia Hills District mynta ka sngi u la leit ban buddien biang ïa ki RTI ba u la dep buh ha ophis jong ka District Selection Committee East Jaiñtia Hills District bad u la ong ruh ba ma u lem bad u Bah K. Ksoo kin sa nang ïai peit kumno ki pyntreikam ïa ki rai ba la shim bad lada ïohi ba dang don ki jingduna kin sa nang ïai bteng beit man la u snem ban buh RTI bad kat haduh mynta u la dep ban buh haduh lai tylli ki RTI ha ophis DSC ha Khliehriat.
“Nga la ïakynduh ïa u Deputy Commissoner kum ka jingbuddien ïa ka kam kaba ïadei bad ka DSC ha East Jaiñtia Hills District, ha kaba ïadei bad ka rai kaba mih na ka jingïalang ba la khot da u DC uba dei u chairman DSC naduh ka 27 tarik u bnai Naiwieng 2025, ha kaba u DC u la khot jingïalang bad shim rai ban don ka jingkylla hapoh ka rukom treikam ka DSC hapoh ka district, ha kato ka por ka rai ka long ba ki ar ngut ki nongmihkhmat kiba na ka district kin ïai buddien halor kane ka bynta na ka Personal Department bad na u Myntri Rangbah ka jylla ha shwa ban sdang ïa ka jingthung kam kum kaba la thungkam ha kine ki khyndiat bnai ba la leit, mynta ka sngi u DC u la ong ba u la dep thoh sha ka tnat Personal Department bad sha ka Home Political Department jong ka jylla ha kaba ïadei bad katei ka rai jong ka DSC, ha ka shithi ba la phah sha u Under Secretary jong ka sorkar jylla bad sha ka Personal Reform Department ha kajuh ka por la phah jingthoh ruh sha ka Home Political department bad ha ki shithi la pynpaw ba kin shimkhia ha kaba ïadei bad ka Independent Observer Panel kumba la rai ha ka jingïalang bad kumba ngi la dawa ba dei ban don u Independent Observer Panel bad la dawa ruh ban pyntikna ba ka jingïaleh exam DSC kan long kaba khuid ba suba da kaba buh ruh da ki cctv,” ong u Bah R. Siangshai.
“Ngi la ai jingmut ruh ïa ka DSC ba donkam ban don khat hynñiew tylli ki bynta ki ban pynbha ïa ka rukom treikam ka DSC khnang ba kan don ka jingshaniah bad ban wanrah ïa ka rukom thungkam kaba khuid ba suba lyngba ka DSC ka ban ai mynsiem ïa ki samla wad kam bad ka bynta kaba nga buddien ka dei ka document process kaba kin sa pyndep bad halor ka bynta ba ngi la ïoh jubab lyngba ka RTI ha kaba ïadei bad ka rukom treikam ka DSC kaba ngan sa pynshai sha ki paidbah bad halor kane ailad ïa nga shi taïew ne ar taïew ngan sa pynshai sha ki paidbah bad nangta pat ka shong ha u paidbah bad na ka liang jong nga ngan tih bniah shuh shuh,” la bynrap u Bah Siangshai.
Ka RTI kaba nyngkong kaba u Bah Reachingson Siangshai u la buh hakhmat ka DSC East Jaiñtia Hills District ka dei kaba naduh ka 16 u bnai Jymmang 2025 bad kane ka dang ïaid haduh mynta, shi bynta ka la don ka rai ban wanrah ïa ka jingkylla bad kane ka dang dei tang ha ka jingthoh kaba yn sa pyntreikam kaba katkum ka jingdawa kaba u la dawa ha kaba la ïa don bynta lang ruh u Bah K. Ksoo, u la ong ba lada ki pyntreikam katkum ka rai kan bha shikatdei eh, hynrei na ka liang jong u, un dang ïai peit bniah kumno ki pyntreikam ïa ki rai bad haduh mynta ki la don haduh lai tylli ki RTI kiba u la buh ha kaba ïadei bad ka jingbym ïaid beit ïaid ryntih ka rukom thungkam ka DSC ha East Jaiñtia Hills District.
