Khliehriat jylliew 22: Ryngkat lang bad ka pyrthei baroh kawei, ha East Jaiñtia Hills District ruh la rakhe ïa ka sngi pyrshah drok ka ‘International day on Drug Abuse and Illicit trafficking’ ïa ka prokram ai jingpynshai la pynlong ha shnong Moopala ha kaba la wan ban ai jingpynshai na ka tnat District Social Welfare East Jaiñtia Hills District, na ka tnat pulit jong ka Khliehriat Police Station, na ka tnat OST, na ka MCSWA, la wan ban ïa shim bynta lang ruh da ki khynnah skul, ki nonghikai bad ki longkmie longkpa jong ka shnong Moopala.
Haba kren ha ka jingialang, u Sub-Inspector uba dei u Incharge jong ka Khliehriat Police Station, u bah W. Nongtdu, u la ai ki jingsneng jingkyntu ïa ki paidbah khamtam ki khynnah samla ba kim dei da lei lei ruh ban ngop ha u drok, la ong ruh ba u drok u ktah haduh katta katta ym tang ïa ka koit ka khiah hynrei u ktah ruh wat ïa ka imlang ka sahlang baroh kawei, la ong ruh ba ka tnat pulit ka ialeh bad duriap ban rat diengkhong ïa ka jingsniew u drok bad ban rat diengkhong ïa kane yn lah dei tang lyngba ka jingiatreilang bad ki paidbah.
Kumjuh ruh ka District Social Officer East Jaiñtia Hills District ka kong R.Pasah, u Incharge jong ka OST Khliehriat, u Dr J.Nongttdu bad ka kong Renibet Patlong kaba dei ka dkhot jong ka MCSWA (NGO) ki la ai ki jingkren halor ki jing sniew kiba mih na u drok, ki da kyntu ruh ïa ki khynnah bad ki samla ba ki dei ban kiar na u drok, namar shisien ba la ngop ha u drok kan wanrah shibun ki jingeh ha baroh ki liang bad kan wanrah ruh ïa ka shong syier ha ki shnong ki thaw, ha ka imlang ka sahlang bad ha ki longiïng longsem jong kito kiba shah ktah ha ki jingsniew jong u drok.
Ia kane ka prokram la khot pynlong da ka tnat District Social Welfare East Jaiñtia Hills District.
