Ai jingpynshai ka DLSA-EJHD halor ka Maintenance and Welfare of Parents and Senior Citizens Act, 2007

Khliehriat, Naiwieng 17 : Ka District Legal Services Authority (DLSA), East Jaiñtia Hills District, kaba hapoh ka jingpeit jingkhmih ka Meghalaya State Legal Services Authority ( MSLSA) mynta ka sngi ka la pynlong ïa ka prokram ai jingpynshai ne ka Legal Awareness Programme ha shnong Jalyiah, East Jaiñtia Hills District.
Ka jingthmu jong ka District Legal Services Authority (DLSA), East Jaiñtia Hills District, ha kane ka prokram ka ka dei ban ai jingpynshai sha ki nongshong shnong ha kaba ïadei bad ka jingbit jingbiang ha ka im lang ka sah lang kaba katkum ka aiñ kaba tip kum ka Maintenance and Welfare of Parents and Senior Citizens Act, 2007 ha kaba ïadei bad ka jingdon ka jingkitkhlieh ïa ki khun ki kti bad ïa ki khynnah kumno ban sumar bha ïa ki bad kumjuh ruh ïa ki riew tymmen kiba ïa shong ïa sah lang ha ïing ha sem.
Na ka liang ka Deputy Chief Legal Aid Defence Counsel, DLSA, East Jaiñtia Hills District, ka kong R Lyngdoh ka la ai ïa ka jingkren maitphang halor ki mat iakren kiba ïadei bad ka bha ka miat ha ka imlang ka sahlang kaba kynthup lang ruh ïa ki riew tymmen kumno ban ai jingkyrshan lem ïa ki ha ka por kaba biang, ban ïada ïa ki ba kin lait na kano kano ka jingshah kyntiat ha ka im lang ka sah lang kaba katkum ka aiñ.
Ka kong R.Lyngdoh ka la pynshai ruh halor ka Maintenance Tribunals bad ka jingdon ki lad ki kabu ban kyrshan ïa ki khlem donkam ban siew pisa ki lad jingiarap kiba lyngba ka aiñ kiba wan lyngba ka District Legal Services Authority (DLSA).
Shuh shuh ka kong R.Lyngdoh ka la kren ruh halor ki mat kiba ïadei bad ka jing ar met ki khynnah kiba dang hapoh rta ne kata ka Teenage Pregnancy bad ong ba kane ka ka buh jingma haduh katta katta ïa ka koit ka khiah bad kane ka shongkha khynnah ka ktah ruh ïa ka pule puthi bad ïa ka longïing, ka la ban jur halor ka jingdonkam ban pynjur ïa ki prokram ai jingpynshai bad kyntu ïa baroh ki paidbah nongshong shnong , ïa ki longkmie, longkpa ba kin pynsaphriang lem ïa ki jingpynshai sha baroh ki nongshong shnong ha kaba ïadei bad ki jingma bad jingeh kiba mih na ka shongkha khynnah, ka kyntu ruh ba kin pynsaphriang lem ïa ka khubor halor ki lad ai jingiarap kiba wan lyngba ka District Legal Services Authority (DLSA) ban ai jingiada ïa ki khynnah kiba dang hapoh rta bad ruh ban pyntip mar mar lada don kano kano ka jingpynkheiñ ïa ki hok jong ki khynnah .
Kane ka prokram jong ka DLSA, East Jaiñtia Hills District ka long ym tang ban ai jingpynshai bad ka dei ruh kum ka jingpynkup bor ïa ka imlang ka sahlang ba ki dei ban tip ïa ki hok long trai jong ki kiba katkum ka aiñ, ka la pynshlur ïa ki paidbah ban don ka mynsiem ka jingkitkhlieh ban kyntiew bad ïada ïa ka imlang ka sahlang, ka pynshlur ruh ïa kiwei kiwei ki tnat treikam ba kin mih shakhmat ban pynlong ïa kaba kum kane ka prokram ai jingpynshai ban ïada ïa ka imlang ka sahlang ban lait na kano kano kaba sniew.