Ai jingmut u MLA ïa ki Shnong Khappud ban ud sha ka Sorkar India ban pynbeit thymmai

Shillong, Ïaiong 04: U MLA ka Mawlai Constituency Bah Process T Sawkmie, ula ai jing mut ïa ki shnong khappud ba kin ud hakhmat ka Sorkar India ïa ka jingbym hun ïa ka soskular pynbeit khappud bala iasoi hapdeng ka Sorkar Meghalaya bad ka Assam.
Kat kum ka jingong jong une u MLA ba shah sospon ka Congress, “Satang ka Sorkar India kaba lah ban leh eiei bad ba lah ban shim rai ïa ka jingeh kaba la pynsngew da ki shnong ki bym hun ïa ka jingïapynbeit pud”.
Kane ka jingkren u MLA kala mih hadien ki jingieng pyrshah jong kiba bun ki shnong ha khappud kiba la shah pynhap sha ka Jylla Assam kat kum ka soskular pynbeit pud bala iasoi hapdeng ka Sorkar Meghalaya bad Assam ha ka 29 tarik Lber ha Nongbah Delhi na ka bynta ki 6 tylli ki jaka ba ïakajia napdeng ki 12 tylli baroh lang.
Kumjuh ruh ki Kynhun Sengbhalang kila pynpaw ïa ka jingpyrshah ïa kane ka soskular haba pyntip ba don ruh wat ki shnong ki bym don hapdeng ka jingïakajia, kila leit sha ka Jylla Assam ha kane ka jingïapynbeit pud ki ar Jylla.
“Ka jingpyrshah hi ka mih namar ba ka Sorkar Jylla kam shym la khot ïa ki kynhun bapher bapher kynthup ki Shnong khappud ban iasyllok haba shit haba shai ïa ki kaiphod jong ki Regional Committee hashuwa ba kan rah sha ka Sorkar India” ong u Bah Process.
Haba pynpaw ba ka lynti ka dang don ban lah pynbeit thymmai ïa kane ka soskular, u Bah Process ula ong “Kane ka soskular kam pat dei kaba kut, kin dang don bun ki jnit ki jnat ba hap ban pyndep bad khatduh ka dei ka Ïingdorbar Parliament ka ban sa shim ïa ka rai ka ban pynkut ïa ka jingïakajia pud”.
“Ka Sorkar India kan sa phah ïa ka Survey of India ban sorjamin biang ïa ki khappud ryngkat ki bor sorkar ka Jylla Meghalaya bad Assam bad khlem pep kin sa ïakynduh ïa ki trai shnong ban sngap ïa ka sur jong ki. Nga ngeit ba kane ka dei ka kabu ksiar ïa ki Shnong khappud ki bym hun ïa ka soskular, ba kin pynsngew sha ka Survey of India ba kan rah sha ka Ministry of Home Affairs” ula ong.
“Nga ai jingmut ïa ki paidbah ba kin ai da ki jingthoh sha ka Survey of India ba kan poi sha ka MHA. Ka MHA ka lah ban phah pynbeit thymmai biang ïa u pud u sam da kaba sngap ïa ka sur u paidbah” ula bynrap.
Ha kawei pat ka liang, une u MLA ula ai ka jingiaroh ïa ka Sorkar Jylla kaba la lah ban pyntyllun shakhmat haduh une u pud ïa ka kam ïapynbeit khappud bad ka Jylla Assam, kaba la sahteng da ki phew phew snem.