Ai jingmut ka Inquiry Commission ban thung da u CMD ba pura ha MeECL
Pynkylla ïa ka rukom trei ha ka thied tiar thied tar
Shillong, Jymmang 25: Ka Inquiry Committee ba laitluid, kala ai jingmut ïa ka Sorkar Jylla ban thung noh da u Chairman cum-Managing Director (CMD) ba pura hapoh ka Tnad Meghalaya Energy Corporation Limited (MeECL) bad ruh ban pynkylla noh ïa ka jingtreikam ka ban khmih ha ka kam thied tiar thied tar.
Haba sam ïa ki katto katne ki jingtip na ka kaiphod jingtohkit, u Myntri Rangbah ka Jylla Conrad Kongkal Sangma hynne ka sngi balang ula ïathuh ba ha ka liang ka Administration (bor pynïaid kam), ka Committee kala ban jur ïa ka jingdonkam ban don noh da u Khlieh Nongïalam ba treikam pura (fulltime).
“Kila ai jingmut ba dei ban don noh da u CMD ba pura lane u CEO ba pura u ban pyntyllun shakhmat ïa ka jing treikam jong ka MeECL” ula ong.
U Conrad ula pyntip ruh ba ka Committee kala kdew ha ki jingshem jong ka ba ka rukom thied tiar thied tar (procurement policy) ka dei kaba la rim bad bym biang shuh haba bynrap “Namar kata, ka donkam ban don noh ïa ka rukom treikam ba thymmai ïa kaba ngi hap ban shong bishar bad ban wanrah ïa ka jingtreikam ba thymmai”.
Haba pyntip ba ka Tnad ka dang bishar ïa ka kaiphod ha baroh ki liang, u Conrad ula ong “Ka Committee kam shym la lap ban don kano kano ka jingleh bakla ha ka rukom thied tiar thied tar”.
Ha ka 29 tarik Lber, ka Inquiry Committee bala khlieh da u (Rtd) Justice RN Mishra kala aiti ïa ka kaiphod jing tohkit halor ki jingkynnoh bamsap bad jingtrei bym hok hapoh ka Tnad Meghalaya Energy Corporation Limited (MeECL).
Ïa kane ka kaiphoid la aiti ha u Myntri Rangbah ka Jylla Conrad Kongkal Sangma ha New Delhi. Kane ka Com mittee ka dei kaba la thung da ka Sorkar Jylla ha ka 29 tarik Naitung 2021 ban tohkit ïa ki jingkynnoh bamsap hapoh Kat kum ki kyndon jingtohkit, kane ka Committee kala pynlong ïa ki jingtohkit halor ka jingthied ïa ki tiar ki tar, ka jingduhnong na ka Technical bad jingdie bording (Technical and Commercial losses), ka jingthungkam ha ki lai tylli ki shnat ba kynthup ïa ka Meghalaya Power Generation Corporation Ltd (MePGCL), Meghalaya Power Transmission Corporation Ltd (MePTCL) bad ka Meghalaya Power Distribution Corporation Ltd (MePDCL).