Nongpoh, Jylliew, 22: Namar ka jingjur palat ki jingïatyngkhuh kali bad ki jingñiah khlem akor ki briew ïa ki kali kumjuh ki ar sha ka shi lynter ka surok bah NH-6, ka HYC Nongpoh Circle hapoh ka jingïalam u samla Tony Shylla kum u president bad u Samla Nicky Nongsiej General Secretary ryngkat kiwei pat ki para dkhot ka seng mynta ka sngi ki la leit ban buh da ka jingthoh ha khmat u Deputy Superintendent of Police ka Ri-Bhoi District U Bah PS Marwein bad U J Rabha DSP Traffic ban pynsngew bad ai jingmut halor ki jing jur ki jing aksiden ha kylleng ki bynta ka surok bah NH-6 ha Ri-Bhoi.
Ha ka jingthoh ba la phah sha ka tnad pulit ka seng ka la ai jingmut ban pynlong da ka jing talasi na ka por sha ka por ha ki surok bah ïa kiba ñiah bad pynher sted ïa ki kali, ki ba buaid kumjuh ruh ïa kiba ñiah bike khlem akor, kiba ñiah sarong bad pynher sted khlem jingmut ha shilynter ka surok bah NH 6, khamtam ha ki por shuti bad ki sngi u blei.
Ha ka jing ïa kren bad kitei ki heh pulit na ka liang jong ki, ki la kubur ïa ki jing jur ki jing aksident ha ki bynta bapher bapher ha ka surok bah NH-6 bad ki jingdon ruh ki nongñiah khlem akor naduh ki kali saw taiar bad ki bike ruh, kumta halor kine ki mat kiba ka seng ka la buh ki bor pulit kin sa shimkhia ban ïada na ki jingjur palat ki aksident ha ka surok bah NH-6.
