Shillong, Nailar 01: Ka Hynniewtrep Youth Council (HYC) ha ka sngi Nyngkong ka la ai jingmut ba ka sorkar jylla kan thaw noh da ka Price Monitoring Agency (PMA) ha ka tnad Consumer Affairs kaban peit pyrman ïa ka dor ka mur ki marbam ha ka jylla naduh ki dukan die dorjon haduh ki dukan die khutia.
Ka HYC ha ka jingïakynduh bad u Bah Prestone Tynsong ka la dawa ba ka sorkar kan shim ïa ki lad ki lynti ban ïarap ïa ki paidbah na ka jingkiew dor ba palat puf ka lyer shet bad kiwei ki marbam mardih bad ki mar ba donkam.
Haba kren bad ki nongthoh khubor hadien ba la wan ïakynduh bad u Bah Prestone Tynsong u Genral Secretary ka HYC u Bah Roykupar Synrem u la ong ba kane ka jingkiew dor kaba palat pud ki marbam mardih kan buh jingeh ïa ki nongshong jong ka jylla.
“Ka dor ki marbam bad ki mar ba donkam kum u khaw, ka umphniang, ka shini, u piat bad kiwei ki jhur ki jhep bad ka jingkiew dor ka tyndong lyer shet ka sorkar jylla kat haduh mynta kam pat shym la shim ïa kino kino ki lad ki lynti ban teh lakam ïa ka dor jong ki” ong u Bah Roykupar.
“Na ka liang ka seng ka dawa ba ka sorkar jylla kan thaw ruh ïa ka Price Monitoring Agency (PMA) kaban peit ïa ka dor ka mur ki marbam bad ki mar ba donkam naduh ka dor dorjon bad ka dor die khutia” u la bynrap shuh shuh.
U Bah Roykupar u la ïathuh ruh ba nalor ka jingthaw ïa ka PMA, ka HYC ka la ai jingmut ruh ha u Bah Prestone ba ka sorkar kan thaw sa ïa ka price monitoring board ba kan lum ïa ki skor jingtip (data) na ki ïew ki hat bad khlieh da u Myntri bad ban ai ka iktiar ba un shim ki rai bad ki lad ki lynti ban ban teh lakam ïa ka dor ka mur. Ka HYC ka la dawa ruh ba ka sorkar kan buh ïa ka Price Stabilisation Fund (PSF) bad ka mang pisa ba la buh lupa khnang ban lah ban teh lakam ïa ka jingkiewdor palat pud ki mar ki mata ba donkam.
Shuh shuh u l ïathuh ruh ba ka seng ka la dawa ba ka sorkar kan buh ïa ka committee ba kan peit pyrman halor ka jingkhaïi tuh ïa ki marbam bad ki mar ba donkam.
Haba ïadei bad ka dor ki tyndong lyer shet u Bah Roykupar u la ïathuh ba ka seng ka la ai jingmut ba ka sorkar jylla kan pan bhah shuh shuh na ka sorkar pdeng na bynta ki longïing ban ïoh tyndong lyer shet lyngba ka Ujjwalla Yojana Scheme.
U Bah Roykupar u la ïathuh ruh ba ka HYC ka dawa ba ka sorkar jylla kan pynduna ïa ka jingoh khajna ïa ki jhur ki jhep ne wat ban weng syndon ruh ïa ka jingshim khajna ïa ki marbam bad ban peit pyrman ïa ka rah ka rong ïa jhur kiba mih na ka jylla ne kiba rung sha ka jylla.
