Shillong, Lber 27 : U Myntri tnad bording AT Mondal ha ka sngi Palei ula pyntip ba ula ïoh ïa ka jingkyrshan kaba radbah na u Myntri Rangbah ka Jylla Conrad K Sangma ban pynjanai ïa ka rukom treikam jong ka Meghalaya Energy Corporation Limited (MeECL) bad kumjuh ruh ïa ka jingpynmih bording hapoh ka Jylla.
“Nga la ïoh ïa ka jingkyrshan ba pura na u Myntri Rangbah. Ngam ju poi pyrkhat ba un ai ka jingkyrshan haduh une u pud bad na kata ka daw ngi la ïatreilang ryngkat ryngkat ban ïohi ïa ka jingtreikam kaba janai jong ka MeECL bad pynjanai ruh ïa ka jingsam bording, bad haba don kino kino ki jingduna, ngi ju pynbeit ïa ki” ong u Mondal haba ïakren bad ki nongthoh khubor.
Haba pynpaw ba kila don shibun ki jingïapher mynta, u Mondal ula ong ba ki paidbah ka Jylla ki ju mad ïa ka jingpynlip bording ba 7-9 kynta shisngi ha u snem 2023. “Hynrei mynta nga ong ba ngi dang lait na ka jingpynlip bording” ula pynbna.
U Myntri ula ong ba kan sa don ka por ba ki briew kin mad ïa ka jingpynlip bording da ka MePDCL ba kan maramot bad pyntrei ïa ka Revamped Distribution Sector Scheme (RDSS) ba dang ïaid mynta.
