Ai jingkyrshan ka KSU Jaiaw Circle ïa ka DS Lumdiengjri halor ki bar jylla ba wan sah beaiñ

Shillong, Lber :Na ka liang ka KSU Jaiaw Circle ha u kyrwoh lyngba u samla Micky Jones Kharbangar, General Secretary ka sngew ban ai ka jingïaroh bad kyrshan pura ïa ka Dorbar Shnong Lumdiengjri hadien ba ka la ïohi shai lyngba ki pathai khubor ïa ka jingmih kynsan ki nongïalam jong katei ka Shnong ha ka 24tarik, Lber 2022, hapoh jingïalam jong u Rangbah Shnong bad ka Executive committee (EC) bathymmai ban kyndang naphang ïa ki bar jylla ki ba wan sah beaiñ hapoh ka shnong ka thaw khlem da ïoh jingbit na ka Dorbar Shnong bad khlem da lah ruh ban pynbiang ïa ki kot ki sla ba donkam, kata kum ka Work Permit, Police Verification na ka jaka kaba ki wan, Trading license, Labour Licence bad kiwei kiwei ki jingdonkam.
Nalor kata ka la pynpaw ruh ba kum ka seng ka ba ju ïai trei bad pyrshang ban tehlakam ïa ka jingrung jingmih laitlan jong ki briew ki ba nabar ka jylla hapoh ka dong ka thaiñ khamtam hapoh ka thaiñ Jaiaw pyllun, ha ba ka ïohi shai ïa katei ka jingshimkhia jong ki riew rangbah ka DS Lumdiengjri ban tehlakam hi da la ka jong ka iktiar ïa ka jingïoh bsuh khlieh laitlan jong ki briew ki ba nabar hapoh ka shnong, ka seng kam lah khlem da pyrto burom bad pynpaw ïa ka jingsngewshngaiñ mynsiem.
Shuh shuh ka Seng ka ngeit skhem ruh ba lyngba ka jingmih shakhmat da ka DS Lumdiengjri ban pyni da ki kam, kiwei ruh ki shnong ki ba don hapoh Sor Shillong bad ka Bri u Hynñiewtrep kin bud nuksa ryntih lang ïa katei ka sienjam khnang ba kum ka seng kan lah shuh shuh ban nang pynjanai ïa ka mat treikam ban aiti ïa u synñiang u bynhei sha kiba bun ki bynta ki ban tei ïa ka longbriew manbriew bad ka Bri u Hynñiewtrep hi baroh kawei.
Ha kajuh ka por na ka liang ka KSU Jaiaw Circle ka kyntu bad pyntip sha ki paidbah nongshong shnong baroh ba ki lah ban pan ïa ki jingdonkam na ki barjylla kum ki kot ki sla kum ka work permit, police verification na ka jaka ba ki wan ban pynshisha ba ki la ïoh jingbit bad ba ki lah ban trei ïa kano kano ka kam katkum ka por ba lah buh.
Na ka liang ka Seng ka pynpaw shuh shuh ba kum ki paidbah trai ri trai muluk ki donkam ban husiar bad peitngor bha ïa ka rung ka mih jong ki barjylla ki ba wan rung hapoh ki shnong ki thaw jong ngi khnang ban lait na kino kino ki jingeh ki ban mih hadien habud.