Shillong, Jylliew: Na ka liang ki bookies ka nongbah Shillong hapoh ka shatri jong ka Hynñiewtrep Archery Bookies Social And Cultural Association (HABSCA) ki ai ka jingkyrshan ka ba pura halor ka jingleit khynra jong ka seng HNYF ïa ki dukan pynthoh Tim ki ba pynïaid beaiñ khlem da don ki kot ki sla ki ba biang.
Ka Seng ka pynkynmaw, ba ha ka 23 tarik u August 2010, ma ki kum ki bookies jong ka nongbah Shillong ki la don ka jingïalang ha Basic Training School ha Malki ha ka ba la wan ïashim bynta da kumba 200 ngut ki dkhot.
Ha katei ka jingïalang ki la ïa kren halor ki ba bun ki jingeh ha ka ba ïa dei bad ka jingsiat Tim ha polo. Hynrei baroh ki long lehnohei namar ba katei ka nong pynïaid ha polo kata ka KHASI HILLS ARCHERY SPORTS INSTITUTE (KHASI) ka la leh trai shaba palat.
Kumta kum ki bookies jong ka nongbah shillong ki ai ka jingïaroh ïa ka sorkar ba ka khlem pynthymmai shuh ïa ka laisen jong ka KHASI. Shuh shuh ki kyrpad ruh ïa ka sorkar ba kan pynduh noh ïa ka rent agreement namar bun ki trai dukan kim treh ban ai namar ba ki tieng ïoh kim lah ban beh shuh ïa ki lada ki donkam ïalade hadien habud, bad kumjuh ruh ïa ki dukan Tim ki ba shong ha footpath naei kin ïoh ïa ka rent agreement.
Halor ka jingkynthoh jong ka KHASI halor ka jingleit khynra ka HNYF ïa ki dukan Tim, ka HABSCA ka la ong ba kane ka pyni shai ba ka KHASI ka ïada ïa ki dukan jong ki non-tribal, namar bun hi ki dukan khasi ki pynbiang ïa ki kot ki sla ki ba biang.Kane ka long katkum u kyrwoh lyngba u Bah Denis Lyngdoh, General secretary HABSCA.
