Shillong, Iaiong 30 : Ka tnad pule puthi History jongka Shillong College ka la pynlong da ka jingïathir, jingbatai bad jingkren halor ka jingïaleh bad ïoh ïa ka jylla Meghalaya “ Hill State Movement and the Emergency of Meghalaya” ha ka 29 tarik Iaiong 2022 ha ka por 11 baje mynstep hapoh ka College.
I Nongkren bad nongbatai ha kane ka prokram i dei i Prof A Banshan Syiem Kharkongor, iba dei naka tnad pule History jongka Union Christian College (UCC). La pynphuh ïa ka prokram da ka jingïalang lang I Principal ka Shillong College Dr (Mrs) E Kharkongor, Vice Principal Prof K.D Roy, ki Nonghikai bad ki samla pule jong ki tnad pule bapher bapher ka College.
Haba kren ha kane ka prokram I Principal ka Shillong College i la ban jur halor ka jingshisha ba ki samla jong kane ka juk ba mynta ki la mad ïa ki jingkylla bad jingïaleh namar ba la jur ki jingkylla haka imlang ka sahlang. Kumta i la ai mynsiem ïa ki samla pule ba kin long kiba la khreh ban ïaleh pyrshah ïa kino kino ki jingkylla namar ma ki ki dei ka lawei jongka jylla bad ka ri ruh kumjuh.
Ka tnad pule History jongka Shillong College ka sngewdonkam ban don ka jingkren bad jingbatai halor ka jingïaleh bad ïoh ïa ka jylla Meghalaya namar donkam ban tip ïa ka history jongka jylla kaba dei ruh shibynta jong ka jingpule. La sngewdonkam ruh ïa kane ka subjek namar ka jylla Meghalaya ruh ka rakhe artat ïa ka jingdap 50 snem jongka mynta u snem 2022.
I Prof A Banshan Syiem Kharkongor i dei i Nonghikai ba la ngam bad tih bniah bha halor kane ka subjek iba la pynmih ruh bun tylli ki kot. Ka kot kaba i dang pyllait dang shen ka long The Hill State Movement in Meghalaya: A Socio-Historical Narrative” kaba la pynmih da ka tnad Arts and Culture jongka sorkar jylla ha ka jingrakhe ïa ka jingplie pyrda ïa ka jingdap 50 snem ka jylla.
Haba ai jingkren bad batai bniah i la ban khia bha ha ka phang kumno ba la poi ban ïaleh ban ïoh ïa ka jylla la jong, kumno ka kylla na ka jingïaleh ki nongïalam sha ka jingïakhih paidbah. La kdew ruh ïa ka jingïashim bynta jong ki samla bad wat ki longkmie ruh ha kane ka jingïaleh ban ïoh ïa ka jylla Meghalaya ba pura. Kaba sngewtynnad eh ha kane ka jingïaleh ka long ba la pyndonkam da ki jingrwai, ki jingpyrta, ki jingthoh, ki poitri ban ïoh ïa ka jylla Meghalaya. Lyngba kine la pynum bad pynkhih buk ïa ka mynsiem jongki paidbah. La pynkut ïa ka jingkren da kaba ïathuh ba la sdang ïaka Meghalaya kum ka Autonomous State ha ka 2 tarik Iaiong 1970 bad ka la ïoh ïa ka jylla ba pura ha ka 21 tarik Kyllalyngkot 1972. Kane ka jingai jingkren bad jingbatai jong I Prof Banshan ka la ai jingmyntoi ym tang ïa ki samla pule hynrei wat ïa ki nonghikai ruh. Lyngba kane ka jingbatai kiba bun ki mat bym pat ju tip baroh shi katta la ïoh jingtip da ki samla bad ki nonghikai shaphang ka histori jongka jylla.
