Shillong, Nailar 21 : U MLA ka BJP na Shillong South ba dei ruh u Chairman ka MTDC Bah Sanbor Shullai u la ai ka jingiaroh ïa ka sorkar jylla kaba la wanrah bun ki jingkylla khamtam eh ban kyntiew stet ia ka kam jngohkai pyrthei ha ka jylla.
Halor kane, u Bah Sanbor u la ong ba kane ka la urlong dei lyngba ka jingtrei borbah jong u Myntri Rangbah ka Jylla Conrad K Sangma kaba la pynlong ïa ka jylla ban poi shaduh kane ka kyrdan kaba kiwei ki sorkar ba la dep kim kot bor satia.
U Bah Sanbor u ong ruh ba ka Shillong mynta ka la kylla long ruh kum kawei na ki jaka pdeng ba ki paidbah na kylleng ki wad ban wan kai pyngad.
“Ki projek kam pynroi kiba wan lyngba ka tnad Tourism ki la sdang ban sei ia u soh jong ka jingtrei shitom ha kine ki khyndiat snem ba la dep,” u la ong da kaba bynrap ba ki sngew sarong ba ka Meghalaya kaba ym ju don mynno mynno ruh hynrei mynta ka la lah ban don ïa ka Five Star hotel nalor bun kiwei kiwei.
Shuh shuh u ong ruh ba lyngba kine ki projek kam pynroi kiba bun ka jylla kan sa lah ban lum bun bha ka khajna na ki kam jngohkai pyrthei nalor ba ka lah ruh ban aikam aijam ai kiba bun. U ong ruh ba kum ka party kaba donlang ha ka sorkar ki shim lang ïa ka jingkitkhhlieh halor kane.
Dang shen haba kren ha ka jingïalang bad ki nongtrei party jong ka South Shillong, u Bah Sanbor u la ong ruh ba ka party ka dei ban trei bad poi sha ki kyndong kynshrot ban ïoh ia ka jingieid bad ka jingshaniah. Nangta u ai jingmut ba ki nongialam ka party ki dei ban da pyrkhat arsien shwa ba kin kren pyrshah ïa ka sorkar namar ki dei ban sngewthuh ba ka BJP ruh ka don ka bynta ha kane ka sorkar synrop.
U Bah Sanbor u la ong ba lada ka don kano kano ka jingbym hun, dei ban ia syllok ha ka sorkar ban ia kaba leit sha ki paidbah. U la ong ruh ba kum ka party ki don bha ïa ka kabu ba kin lah ban jop bun bha ha ka elekshon ban wan bad kumta ka thong ba hakhmat eh mynta ka long ban jop kham bun ha ka elekshon kaban wan.
