Shillong, ïaïong : U MLA ka Mawlai u Bah PT Sawkmie ha ka sngi Hatmajai u la leit ban ai jingïarap ïa ka St. Mark School (CNI) kaba don haduh ka klass baphra ha Mawsiatkhnam ha ka jingdon ryngkat u Rev. Deacon P. Jyrwa, ki bangeit, ki nonghikai bad kiwei.
Ha kane ka juh ka sngi u MLA u la jurip ruh ïa ka jaka kaba don ha Ïingmane CNI kaba donkam ban kynroh ryngkat bad ki heh PWD bad kumjuh ïa ka jaka ban shna ïa ka kamra shetja na ka bynta ki khynnah skul.
Haba ai jingkren u Bah Jyrwa u la pynpaw ïa ka jingkmen halor ka jingshimkhia jong u Bah PT Sawkmie ban wan jngoh ïa ka jaka ban kynroh bad kumjuh ïa ka jaka ban shna ïa ka kamra shet ja na ka bynta ki khynnah skul, kaba ki la kyrpad na u MLA ha kine ki sngi ba la leit.
Na ka liang u bah Jyrwa u ïathuh ba ka la don teng ka kali kaba la hap shapoh phyllaw Ïingmane ha ki por ba la leit hadien ba ka la kum bakla ïaid na ka surok kaba don harud kane ka Ïingmane.
Katba na ka liang u MLA ha ba ai jingkren ha kane ka sngi ha i jingïalang balyngkot u pynpaw ba ka jingwan jong u ha CNI Mawsiatkhnam ka long ba na ka por sha ka por ki nongïalam Balang ki la pynsngew sha u haba ïa dei bad ka kynroh kaba ki la angnud bad u pyntip sha ki ba kane ka kynroh ka long kaba donkam bha bad shen kin sa ïoh ban shna noh ïa ka.
Ha kajuh ka por u la pyntip ruh ba shen kin sa buh sa ka Ambulance ha PHC Mawsiatkhnam kaban la mang thik na ka bynta ki paidbah kane ka thaiñ haba ki pang ki shitom bad ban kit ïa ki haba ki doctor ki bthah ban leit sha sorbah Shillong ne sha Guwahati.
