Shillong, ïaïong : Kum shi bynta ban ithuh bad pynshlur ïa ka jingtrei shitom, u MLA ka Mawlai u Bah PT Sawkmie hynne ka sngi u la ai jingïarap da ka song pisa sha u samla Bakyrshan Mawlong, uba ju die umsoh ha Nan Polok, ïa ka ba u la ai ha ïingsah jong u ha Mawlai Mawkynroh Umshing.
Ka jingïarap kaba u MLA u la ai ka long ban thied ïa ka tiar Inverter bad batery kaba un lah ban shna ïa ka um soh ha ka jaka kaba u die, namar baroh shi katta la shu shna na ïing bad sa leit rah sha Nan Polok ban die bad haba wan u slap, u duhnong namar ba ki sepei lut.
Haba pynpaw ïa ka jingsngewnguh ïa u MLA u samla Bakyrshan u la ai khublei ïa u Bah PT Sawkmie uba la sngewkhia bad shah skhor ïa ka jingud jong u ban kyrshan lem na ka bynta kane ka kam kaba u la leh.
Na ka liang u Bakyrshan u ïathuh ba naduh dang step phyrngap man ka sngi u la poi sha Nan Polok ban die ïa kine ki um soh ba u shna hi, na u soh grape, water melon, soh Apple bad kiwei ki jait soh.
Na ka liang u MLA hashwa ban ai ïa ka song u la pynpaw ba u dap da ka jingkmen ban ïohi ïa ki khun samla Khasi ba ki la sngewthuh ban seng da ka kam lajong bad ban ïeng ha la ki jong ki kjat.
U MLA u ïathuh, hadien ba la wan ud wan nam u samla Bakyrshan u sngew ba ka dei ban ïarap ïa u namar ba u ïohi ïa ka jingtrei shitom jong u. U la pynpaw ruh, hadien ba u la dep mad ïa ka umsoh ba u la shna hi, ka pher bha, bad kaba sngewtynnat ka long ba kane ka umsoh ka long 100 na ka 100 na u soh ba shna, la dei u apple, sohñiamtra bad kiwei ki jaitsoh, khlem da don jingkhleh. Kane kan ïarap bha ïa ka koit ka khiah, ong u Bah PT Sawkmie.
Shuh shuh u la kyntu ruh ïa u samla Bakyrshan ba un nym ailad ïa ka jingthait, kaba lah ban wan hadien habud ha ka jingïaid lynti jong u ha kane ka kam. U ai mynsiem ba ha kawei ka sngi u lah ban long u nongkhaïi uba khraw, kumta kaba donkam hi ka long ban trei shitom bad ban don ïa ka mynsiem ïa khun. U pynpaw ruh ba u ngeit skhem ba ha kawei ka sngi un long u nongai kam, ym u nongwad kam.
Ha ka juh ka por u Bah Sawkmie u kyntu bad pynshlur ïa ki khun samla khamtam ha kum kine ki sngi kaba eh bha ban ïoh kam sorkar, ba ki long shlur ban seng kam lajong.
Ha kane ka sngi la ïoh ruh ïa ka jingkren na u Bah Wanseng Jyrwa, working president ka Mawlai Constituency Progressive Forum ha ka jingiadon lang i kmie bad ki ba haïing hasem.
