Ai jingïarap u Bah Teibor Pathaw sha ki 10 tylli ki longïing ba shah ktah na ‘erïong ha Umphrew

Shillong, ïaïong: U MDC ka Mawlai constituency, u Bah Teiborlang Pathaw ha ka step jong ka 20 tarik mynta u bnai u la ïoh ban leit aijingïarap sha ki 10 tylli ki longïing hapoh ka shnong Umphrew ki ba la shah pynjulor ha ka ‘eriong ka ba la jia ha ka 14 tarik mynta u bnai.
San tylli ki longïing, ka jing julor ka la kham bun, katba san tylli pat ka jingjulor ka kham duna. Ka ba sngew synei ka long ba ha kawei na ki longïing ha ka por ba wan kane ka ‘eriong ki don ki khynnah rit hynrei da ka jingkloi ka jingmut jin pyrkhat ki la ïa rung sha khrum jingthiah bad kila lait na ka jing mynsaw.
Ha kane ka sngi na ka liang u Bah Teibor ula pyntip ruh ba ïa ka ophis treikam jong u ha Nongkohlew yn sa plie noh ha u bnai Jymmang u ban wan khnang ban pynsuk ïa ki paidbah ki ba don sha kine ki thaiñ nongkyndong bad un dei ruh u nong mihkhmat Mawlai uba nyngkong u ban buh ophis ha kane ka thaiñ.
Shuh shuh u la pyntip ruh ba ha kane ka juh ka jaka un sa buh ïa ka ‘Kiosk Banking’ ka ba ki paidbah kane ka thaiñ kin ïoh ban thep bad sei pisa khlem da donkam shuh ban wan shaduh sha ki thaiñ Mawlai shaneng ka ba la kham pajih.