Shillong, Risaw 27 : U Bah PT Sawkmie, MLA barim ha ka 24 tarik u Risaw, 2024 u la ai jingïarap ïa ki nongpynïaid jong ka Jubilee RCLP School, Umpling, Mawsiatkhnam, na ka bynta ba kin peit kin khmih ïa ki khynnah skul kiba duk ba jynjar haba ki don hapdeng ka jingeh.
Haba ai jingkren ha ka jingïalang ba la pynlong hapoh skul u bah Sawkmie u kyntu ruh ïa ki nongpynïaid skul ba kin long la kloi ban pyntip sha u haba ki don kano kano ka jingeh, khnang ba un lah ban ïarap ïa ki, la ka dei ka bai skul ki khynnah lane ki bai kot bai sla bad kiwei.
U la pynpaw ba un ïakren ruh bad ka sorkar haba ïa dei bad kane ka skul, khnang ba kin ïoh ïa ka jingïarap halor ki jingdonkam jong ka.
Katkum ka Head Teacher ka Kong Labasa Lyngdoh, ka ïathuh ba kane ka skul ka dang bun bha ki jingduna naduh ba la seng ïa ka.
Ha kane ka sngi la ïoh ruh ïa ka jingkren maitphang na u bah Khraw Lyngdoh, assistant secretary ka CMC Umpling bad na u rangbah balang bah Teiboklang Lyngdoh .
