Jowai, Nailur, 10: San ngut shiparalok na ka shnong Mooshrot ha ka sngi Saitjaiñ ki la leit ban ai sngewbha da ka dewbilat haduh 20 byrni sha kawei ka skul ban shna thymmai ha ka shnong Mooluber, West Jaiñtia Hills District kaba hap ha ki thaiñ Block-1.
Kine ki shi paralok kynthup ïa u samla Franky Lyngdoh, u samla Justice Paul Lyngdoh, u Romingstar Lamare, u Remdor Lyngdoh bad u Kamio Bïam.
Ïa katei ka skul dei kaba shu sdang ban shna tang ar kamra klas na ka bynta ki khynnah jong ka shnong Mooluber ba kin ïoh ban leit skul ha katei ka skul kaba la khmih da ka Balang Presbyterian Mowluber ha ryngkat ki rangbah jong katei ka shnong.
La ïathuh namar ka jingbym don skul ha katei ka shnong, ki kmie ki kpa ki shem shitom bha ban phah skul ïa la ki khun khamtam ha katei ka dong baroh ki khynnah kim shym la ioh lad ban leit skul sha ki shnong kiba kham jngai namar ka jingduk bad ka jngai ban phah sha kiwei pat ki shnong ba marjan.
Na ka liang jong kine ki samla ki la kyntu ki kyrpad ïa kiwei ki paralok ki sengbhalang ne ki riewshimet ba kin sngewbha ban khmih lem ïa kum ka kine ki bynta ba donkam kyrpang da kaba kner ban ai ka kti ka mon kti ka diang da kaba noh kylluid mynsiem sha katei ka skul na ka bynta ban kyntiew ïa ka pule ka puthi ha katei ka thaiñ.
Kine ki san ngut shiparalok ki la pyntip lada don kiba kwah ban kner ki jingïarap sha katei ka skul kin sngewbha ban telephone ha u Secretary jong ka skul u Ma Wadjingsuk Bïam lyngba u Mobile Number: 918787780858 bad ha ka juh ka por uba long ruh u nonghikai bad u nongkhmih ïa ka skul.
