Ai jingïarap ka Star Cement sha ki lanot shlei um ha Garo Hills ha ryngkat ka MP Tura

Tura, Jylliew : Ka Star Cement dang shen ka la pynlong ïa ka jingai jingïarap na ka bynta ki lanot shlei um ha kito ki jaka ki ba la shah ktah ha Garo Hills, Meghalaya.
Ha ka jingleit aijingïarap ka ba nyngkong la plie da ka MP ka Tura ka Agatha Sangma ha ryngkat ka jingïadon lang ka kmie jong ka, ka ba dei ruh ka kurim jong u Lamphang barim ka Lok Sabha u PA Sangma.
Kane ka kynhun aijingïarap ka Star Cement ka la ïashim bynta ha ka ba aijingïarap sha kito ki longïing longsem ki ba la shah ktah ha ka jingshlei um da ka ba ïarap da ki mar bam bad kiwei pat ki jingdonkam ba kongsan khnang ba kin lah ban kyrshan ha ka ba kum kane ka jinglong jingman.Ha kane ka kam aijingïarap la ïashim bynta lang ruh da ki bor pynïaid ka district jong kito ki jaka ba la shah ktah.
Man la ka sngi kane ka karkhana pynmih dewbilat ka ju pynpoi haduh sawtylli ki trok ki ba kit ïa ki marbam bad kiwei pat ki jingdonkam ba kongsan, kata kum u khaw, u dai, mluh, biskit, bon bad kiwei pat kynthup ïa ka umbam um dih ha ki ba bun ki jaka ki ba la shah ktah ha ka jingshlei um ha Garo Hills.
ïa kane ka kam aijingïarap la pynlong ha kito ki jaka ki ba shah ktah jur jong ka Garo Hills, kata kum ha Siju, Mahadew, Maheskola bad ki jaka ba marjan.Ki ba bun na kine ki jaka ki dei ki ba la sahkut na kiwei pat ki jaka bad ka ba shem jingeh shibun ban poi.Hynrei na ka liang ka Star Cement kam shym la randien hynrei ka la ïaksaid ban pynïoh ïa kine ki jingïarap sha kitei ki jaka.
Ha ba pynpaw halor kane ka jingpynïoh ïa kine ki jingïarap marbam bad kiwei pat ki jingdonkam, naka liang u Shree Pradeep Purohit, Chief Strategy Officer u la ong; “Ka Star Cement barabor ka don ïa ka jingkut jingmut ban shakri ïa ki paidbah ka jylla Meghalaya ha ki por jong ka jingdonkam.” U la ong ruh ba kin dang ïai bteng ïa kine ki kam aijingïarap tad haduh ba ka jinglong jingman na ka jingshlei um kan kham biang.”
“Ngi kyntu jur ïa baroh ki nongshong shnong jong ka ri ba kin wan shakhmat bad ban kner ïa ki kti jong ka jingïarap sha ki lanot shlei um da ka ba noh synñiang ha kino kino ki bynta ki ba ki lah,” u la ong shuh shuh.