Nongpoh, Jymmang 14: Ka seng Hynniewtrep Peoples Front (HPF) Ri-Bhoi District da ka jingsngewkhia kaba jur halor ka jingmad jingeh jong kawei ka longiing ki khunswet kaba don 4 ngut shi para haka shnong Umden Umsaitprah, hynnin ka sngi kla leit ban ai jingïarap da ki marbam kum ka jingïarap ban tynrong lem ïaka jingeh ba mad da katei ka longiing bad ban ai mynsiem ïaki ba kim dei ban duh jingkyrmen.
Ka seng hapoh ka jingïalam jong u Bah Sil Masharing Vice President ka seng ha ryngkat ki dkhot ki hiar sha katei ka shnong naka bynta ban leit ai jingïarap katba ka seng ka lah khnang ba katei ka longiing jong ki khunswet kiba don 4 ngut shipara kan ioh mynsiem bad ban tynrong lem ïaka jingeh kaba mad, haka jingdonlang u Bah Justine Kharbuki Rangbah Shnong.
Haba phai sha ka jinglong jingman katei ka longiing naka liang ka seng ka dap da ka jingsngewkhia kaba jur ba kitei ki 4 ngut shipara ki bym don shuh ki kmie ki kpa bad ki nongsumar ki mad ka jingeh bad ka jingjynjar ban pyndap ïaka iing ka sem nalor ka iing kaba la jot la pei bad donkam ka jingïarap ba kyrkieh ba kin ioh ka iing sah kaba paka ban shong ban sah bad lait naka sngi u slap.
Naka liang ka seng kala pynpaw ruh ba katei ka jingleit ai jingïarap ka long tang kum ka dak bad pynpaw ka jingsngewsih kam ioh ban iarap ïaki jingdonkam jong katei ka longiing hynrei kala kyrpad sha ki kynhun bapher bapher naduh ki nongmihkhmat ban phaikhmat lem ïaka jingeh jong katei ka longiing.
Naka liang ka shnong Umden Umsaitprah lyngba u Bah Justine Kahrabuki Rangbah Shnong u la ai ka jingkhublei ba kyrpang ïaka seng HPF kala kynmaw bad shim ïaka sienjam ban leit ai jingïarap ïa katei ka longiing kum ka jingtynrong lem ïaka jingdonkam jong ki ba man ka sngi ryngkat ka kyrkhu kyrdoh ïaki nongïalam ka seng HPF ba kin dang lah shuh shuh ban trei bad shakri naka bynta ka imlang ka sahlang bad ka ri bad ka jaitbynriew.
