Jowai, Risaw, 29: Ka tnad ka koit ka khiah lyngba ka ophis u Block Medical Officer, Amlarem Block, ha ryngkat ka jingïatreilang bad ka tnad pule puthi ka West Jaiñtia Hills District, ki la pynlong ïa ka prokram ai jinghikai ba saw sngi halor ka “School Health and Wellness Ambassador Programme” kaba la sdang naduh mynta ka sngi 28 tarik haduh ka 31 tarik u Risaw, 2025, ha Amlarem Secondary School Conference Hall.
La pynlong ïa kane ka prokram hapoh ka jingpeit jong ka National Health Mission (NHM) bad ka School Health and Wellness Programme (SHWP) kaba dei ka jingthmu jong ka Ministry of Health and Family Welfare jong ka Sorkar India bad ka thong jong kane ka prokram ka long ban pynkhlaiñ ïa ka rukom treikam jong ka Rashtriya Bal Swasthya Karyakram (RBSK), kaba peit kyrpang halor ka koit ka khiah jong ki khynnah skul da kaba pynïoh jingsumar ha ka por kaba biang.
Ha kane ka prokram la ïadonlang da 78 ngut ki nonghikai na ki skul Upper Primary bapher bapher jong ka Amlarem Sub-Division, ryngkat bad 6 ngut ki ophisar, ki Doctor bad ki riew shemphang. La ai jinghikai ïa ki nonghikai ban kin ithuh ïa ki dak ki shim jong ki jait jingpang ha ki khynnah skul kiba doh naduh Class VI haduh VIII.
Ki bynta ban ai jinghikai ki kynthup ïa ka koit kaba khiah, jinglehkhuid, ka jingmut jingpyrkhat ba bha, ban kiar na u drugs, ka jingïada na ka jingshah ban beiñ ne shah pynmynsaw, ka rukom pyndonkam hok ïa ki internet, ki tiar digital nalor kiwei de.
Ki nongai jinghikai ha kane ka prokram ba saw sngi lynter ki kynthup ïa Dr. R. Laloo, Dr. M. Gashnga, kong P. War bad ka kong D. Laloo, la pyntip ba ha ka sngi ba khadduh kan long kyrpang na ka bynta ki Principal bad ki Headmaster kiba don ka jingkitkhlieh ïa ka skul hi baroh kawei.
Na ka liang u Block Medical Officer, Dr. A. Khonglah, haba ai jingkren ula ong ba kane ka jingïalang ka long kaba don jingmut bha na ka bynta ki skul ba kin tip shaphang ka koit ka khiah, bad ban ai jingsumar kloi ïa ki khynnah ha ka por ba biang.
Ha kane ka prokram yn don ka jingsam ïa ki kot lyngkdop (IEC materials) bad ki syrnot sha baroh ki nonghikai, kum ka lad ban kyntiew ïa ka koit ka khiah bad ka jingbha jong ki khynnah skul hapoh ka School Health and Wellness Programme.
