Nongpoh, Naitung 05: Kum kawei na ka thong ban ai ka jinghikai kaba kyrpang kumno ban dang pynbit pynbiang ha ki jaka ai jingsumar, ka PA Sangma International Medical College & Hospital (PIMCH), ha USTM mynta ka sngi ka la pynlong da ka prokram ai jinghikai kaba kyrpang ba la tip kum kita ki Good Clinical Practice, kaba dei shaphang kata ka rukom ban wad bniah ïa ki rukom treikam ha ki jaka ai jingsumar.
Haba pynlong ïa kane ka prorkam ai jinghikai, la ïa trei ryngkat ruh bad ka INFOCLIN Consultancy. Kane ka dei ka sienjam ba la pynlong da ka PA. Sangma International Medical College & Hospital ka USTM, kiba don kata ka jingthmu ban pynbit pynbiang ha ki bynta jong ki jaka ai jingsumar.
Ki riew shemphang ba kynthup naduh u Prof. Dr. Subhrojyoti Bhowmick, M.D, u Clinical Director jong ka FISQua (UK), Academics, Quality & Research, Peerless Hospital, u B K Roy Research Centre, Kolkata, ka Prof (Dr) ka Anita Dakua, Associate Prof, ka tnad Pharmacology, ka PIMCH; Ka Sabari Dasgupta, ka Senior Clinical Trial Monitor, ka INFOCLIN bad ka Prof (Dr) Pinaki Chakravarty, ki la don bynta ha kane ka sngi nalor ka jingshim bynta ki Doctor bad ki samla jong katei ka skulbah.
Haba kren ha kane ka sngi, halor ka phang “ICH-Good Clinical Practice (GCP), u Prof (Dr) Subhrojyoti Bhowmick, u la ong ba ka GCP ka dei ban long kawei na ka bynta kaba ngi hap ban kitkhlieh, ban kyrshan bad ruh ban peit bniah da ki bor ka aiñ, halor ka rukom ai dawai ne ka rukom sumar, kaba ym dei ban shu leh thurmur ne ktah ia ki paidbah ba pang ba shitom ha ka por ba ki wan sha ki jaka ai jingsumar.
Une u riewshemphang shaphang ki jingsumar kiba dei katkum ka kyndon jong ka GCP, u la ong ba ka jingthmu jong kane ka GCP, ka dei ban long ba kino kino kiba don bynta ha kane ka kam, ki dei ban don ka mynsiem ba kylluid, ka mon sngewbha bad ka jinghun mynsiem bad ym ba ngin buh ïa kita ki jaka ai jingsumar tang ban pyndep rukom, namar kane ka ktah ïa ka kam ïap ka kam im jong u paidbah.
Shuh shuh, u Dr. Bhowmick, u la bynrap ruh da kaba ong, ba kum kita kiba buh ïa ki jaka ai jingsumar na ka bynta kiba pang ba shitom, ki dei ban bud katkum ki kyndon aiñ haba ai jingsumar ne buh dawai na ka bynta ki paidbah, namar kane ka kam kam dei ka kam kaba ngi lah ban leh mon bad shuwa ban leh ïa kine ki kam ngi hap ban pynlong da ka jingwad bniah bad leh paka ban ioh jingmyntoi ki paidbah, u la bynrap.
