Ai jinghikai kyrpang ka NHDC ïa ki nongthaiñ jaiñ ha Ri Bhoi ba kin lah ban ïeng ha la ki jong ki kjat
Nongpoh, Jylliew 11: Ban pynshai paidbah sha baroh ki nongthaiñ jaiñ ha Ri Bhoi khamtam ha Diwon bad ha Umden kiba dei ki shnoing ba la paw bha ha ka kam thaiñ jaiñ, ka National Handloom Development Corporation Limited (NHDC) ka la pynlong da ka jingai jinghikai ba kyrpag ïa ki nongthaiñ jaiñ ha DUYA Auditoriuam Hall, Diwon hynnin ka sngi Thohdieng jong ka taiew.
Kane ka jingpynlong ka NHDC ïa kane ka jingai jinghikai (Seminar for Weaver Entrepreneur) ka long ruh shi bynta ban pynshai ïa ki skhim sorkar bapher bapher ba la wan rah da ka sorkar India lyngba ka Ministry of Textiles.
Ha kane ka prokram ai jinghikai la wan ban shim bynta da ki nongthaiñ jaiñ na ka shnong Umden bad Diwon ha Ri Bhoi District bad la don ryngkat ruh ki nongïalam ka Meghalaya Ryndia Producers Association ba la lam khmat da u Samla Precious Tmung kum u President.
Kiwei kiwei kiba la ïa don lang ha kane ka sngi ki kynthup ïa u Bah Streling Khymdeit, Secretary Shnong ka Shnong Diwon, ka Kong M. Suphai, ka Kong K. Marsing bad kiwei kiwei ki nongïalam bad ki nongthaiñ jaiñ ba kham paw na ka thaiñ Umden ha Ri Bhoi.
U Samla Precious Tmung, President ka Meghalaya Ryndia Producers Association haba kren ha kane ka sngi u la ong ba ki don shibun ki jingmyntoi ba ki nongthaiñ jaiñ ki ioh jingmyntoi na ka Ministry of Textile bad Handlooms bad u la buhr uh ka jingkyrpad ïa ki nongthaiñ jaiñ ba kin pyndonkam hok ïa ki skhim ba la wan rah da ka sorkar.
Lyngba jong kane ka sngi u la kdew ruh shibun ki kynja skhim ba la ioh na ka sorkar India lyngba ka Ministry of Textile bad Handlooms, hynrei ka dei pat ka kamram jong ki nongthaiñ jaiñ ba ki hap ban pyndonkam hok bad shim ïa ka kabu katba ka sorkar ka dang theh ïa kita ki lad jingïarap kyrpang na ka bynta ki nongthaiñ jaiñ.
Na ka liang u Nilesh Sukhadeve, Senior Manager (Commercial), NHDC Ltd. Guwahati haba kren ha kane ka sngi u la pynsai ba ki don shisha shibun ki jingmyntoi ba ki nongthaiñ jaiñ ki dei ban ioh na ka sorkar ba kynthup kum ka Transport Subsidy bad kynthup ruh kum ka jingpynmih ïa ki ksai, ki rong bad kiwei kiwei ki tiar kiba ki lah ban ioh jingmyntoi lyngba ka Handloom na kata kaba ki ju tup kum kata ka Yarb Passbook.
Kumba ka Ri Bhoi ka dei kawei na ka District kaba la bna nam ha ka ri bad ka pyrthei halor ka jinglah ban pynmih ïa ka jain ryndia, utei u Senior Manage ka HNDC, Limited na Guwhati u la pynshlur ruh ba kin trei shitom ban thaiñ ïa ki jain kiba don ka dor bad kaba khring ïa ki khmat jong kiwei ha kaba ngi lah ban pynïaid iew ym tang ha ka ri India bad wat ha kiba bun ki ri jong ka pyrthei, u la bynrap.