Khliehriat jylliew 23: Ka tnat pulit jong ka Umtyra Infiltration Check Post, Easte Jaiñtia Hills District, mynta ka sngi ka la pynlong ïa ka prokram kaba kyrpang ha shnong Umtyra bad ha kane ka prokram la pynshai paidbah halor ki jingsniew kiba mih na ki drok bad kyntu ruh ïa ki paidbah khamtam ki khynnah bad ki samla ba ki dei ban long kiba skhem jingmut ba ym dei satia ban ngop ha ka jingdih drok.
U Sub Inspector uba dei ruh u Incharge jong ka Untyra Infiltration Check Post, u bah R.B. Swer haba kren ha ka jingialang ba la pynlong ha Umtyra Community Hall, u la pynsngew shibun kiei kiei ki jingsniew kiba mih na kaba dih drok, namar kiba dih drok bad kiba la kyrni ka jingdih drok bunsien ki Shah ktah ha koit ka khiah, ki buh jingeh ha ki longiïng longsnem jong ki bad ki buh jingeh, jingbym shngain ruh ha ki shnong ki thaw bad ha ka imlang ka sahlang, u la kyntu jur khamtam ïa ki khynnah bad ki samla ba ki dei beit ban ong ‘Em ïa u Drok’ namar shisien ba la ngop ka long kaba eh than ban lait na ki kynjri jong u drok.
Ha shwa ban pynkut ïa ka prokram, u Sub Inspector, u bah R.B.Swer, u la ialam ha ka jingpule ïa ka jingkular lane ka Pledge ban kular skhem ban ong ‘Em ïa u drok’ bad ban nym dei satia ban ngop ha u drok, ïa ka pledge la iashim bynta da ki paidbah kiba wan sha ka jingialang ba kynthup lang ruh ki khynnah skul.
Kiba la ïa don ryngkat lang ha kane ka awareness prokram ha Umtyra, ki kynthup ruh ki pulit jong ka Umtyra Infiltartion Check Post, u Waheh Shong, u Secretary shnong Umtrya bad kumjuh ruh ki nongialam niam.
