Jowai, Jylliew 25: Ka seng ki longkmie ka ‘Women Welfare Organisation Seiñraij Jowai’ ha ryngkat ka jingïatreilang bad ka Assam Don Bosco University lyngba ka jingkyrshan jong ka UNICEF, mynta ka sngi saitjaiñ kila pynlong ïa ka prokram pynsngewthuh paidbah shaphang ki lad jingïada naka khlam Covid-19.
La pynsngew ha kane ka prokram ba ka jingai dawai tika ka dei kawei na ki lad kaba lah ban khanglad na ka jingsaphriang jong ka khlam Covid-19 nalor kiwei de ki lad jingïada kiba la bthah da ka sorkar.
Dang ha kine ki 2 snem ba la dep ka jingwan lynshop jong ka khlam Covid-19 kala wanrah jingeh bad kaba la khang lad khang lynti ha kiba bun ki liang. Hynrei dei ha kane ka snem 2022 ka pyrthei baroh kawei kala sdang ban wan biang kumba long mynshwa bad kaba donkam mynta ka long ban pyndep ïa ka jingai tika ha manla uwei pa uwei u nongshong shnong la pynsngew ki nongai jingbatia ha kane ka prokram.
La ïoh ruh ka jingkren ha kane ka prokram da ka kong Wa-i-sa Sumer ka Adviser ka WWOSRJ kaba la pynsngew ba ka seng kan ïaleh katba lah ban ai jinghikai ïa ki nongshong shnong lyngba ki prorkam bapher bapher bad ban bud ryntip manla ka sngi ïa ki lad jingïada bala bthah da ka sorkar.
Katba na ka liang ka Sumki Degum Project Co-ordinator ka North East Assam Don Bosco University kala la pynsngew shaphang ki kam ba kane ka kynhun jong kila leh na ka bynta ki paidbah nongshnong shnong naduh ka jingleit pynsngewthuh shapoh ki shnong jong ki, ka Sumki Degum ka ong la jied khnang ïa kum kine ki seng treimon sngewbha ka long ba kin ïarap ban leit ai jingtip khambniah sha ki paidbah.
Ha ka bynta ba ar jong kane ka prokram la ïoh ki jingbatai bnaih da ka Dr. H. Uriah District Maternal and Child Health Officer WJHD Jowai, u ma Georgina Lamare Social Behavior Change Consultant, UNICEF bad kiwei.
La wan sha kane ka prokram da ki nonghikai, ki dkhot ka WWO Seiñraij Jowai ki paidbah nongshong shnong naduh ki longkmie bad ki longkpa.
