Ai jinghikai ka TRSF ïa ki nongrep ha shnong Mukhaïalong halor ka rukom rep da ka sboh organic

Khliehriat, Risaw 4: Ka Tribal and Rural Social Foundation mynta ka sngi ka la sdang ïa ka prokram ai jinghikai ïa ki paidbah nongrep jong ka shnong Mukhaïalong, East Jaiñtia Hills District, ka jingai jinghikai ka long halor ka phang ban pyndonkam da ki sboh organic bad kane jingïa jinghikai kan neh haduh lai bnai, ïa kane ka prokram ai la kyrshan da ka Meghalaya State Skill Development.
U Chief Coordinator jong ka Tribal and Rural Social Foundation, u bah Biangpor Shylla, u la pynïaid ïa ka prokram ha kaba u la ai ruh ïa ka jingkren maitphang bad hikai ïa ki paidbah kumno ban sdang ïa kane ka rukom rep kaba da ka sboh organic kaba ym don jingkhleh dawai chemical, u la ong ruh ba ïa ki tiar ba donkam yn sa ai hadien ba la dep kane ka jinghikai.
U Skill Development Officer, MSSDS, East Jaiñtia Hills District, u bah T.Pohtmi, u la kyntu ïa baroh kiba la wan sha kane ka jingshah hikai ba ki dei ban wan tista bad shim khia namar kane kan wanrah jingmyntoi ïa ki hi ha kaba ki lah ban die ïa ka sboh bad kumjuh ruh ki lah ban pyndonkam ha ka rep ka riang namar kane ka sboh organic ka dei ka jait sboh ka byn nym pynsniew eiei ïa ka khyndew bad ka long ruh kaba bha ban pyndonkam, ha kajuh ka por u pynshlur ïa ki paidbah nongrep jong ka shnong ba ki dei ban shim ïa kane ka kabu ka ban ïarap ban kyntiew ïa ka ioh ka kot.
Kiba la ai jingkren ha ka jingialang, ki kynthup ruh u Waheh Shnong Mukhaïalong, u bah Hundred Phawa, uba la ai ka jingkren pdiang burom, u Coordinator jong ka Tribal and Rural Social Foundation, u bah Preacher Bareh, u la ai ka jingkren ai khublei.
Ha kane ka sngi ki la don shibun ki nongshong shnong jong ka shnong Mukhaïalong kiba la wan ban ïa shimbynta ha kane ka prokram ai jinghikai bad ïa kane ka prokram la pynïaid da ka Dorbar Shnong Mukhaïalong.