Shillong, Nailar 07: Ka Education Department jong ka Sohra Government College ryngkat ka jingïatreilang bad ka Sohra Coaching centre ka la pynlong ïa ka jingai jinghikai bakyrpang ïa ki samla pule ka kolej kiban ïakhun ïa ka Common University Entrance Test(CUET-PG) ha ka 5 tarik Nailar.
Kane ka jingai jinghikai da ka kolej ka long shi bynta ban ïarap ïa ki samla pule ban pynkhreh ha kaban ïakhun ïa kane ka eksamin khnang ban ioh bteng ïa ki jingpule ha ki kyrdan Master Degree ha NEHU bad kiwei de ki jaka pule.
Hadien ka jinghikai kaba bniah na ki Nongai jinghikai, la ioh ruh ïa ka jingkren ai mynsiem na I Babu C.Khongngain uwei na ki dkhot ka Sohra Coaching Centre. Ha ka jingkren ju Babu C Khongngain u la ai mynsiem bad kyrkhu kyrdon namar kine ki samla ki long kum kynhun shipai banyngkong eh ban ïakhun ïa kane ka CUET-PG lyngba ki kor kompiwtor (CBT) bad u la ban jur ruh ba ki dei ban ïakhun da ka jingshlur ban ioh ïa ka thong, khnang ba ma ki hi ha kawei ka sngi kin sa ioh ban long ki nonghikai ha ki college jong ka jylla. Shuh shuh u la pynkynmaw ba lada kim trei shitom kan long ka jingduh jingmyntoi hi ïa ka lawei jong ki ha ka pule puthi.
U Babu C Khongngain u la pynpaw ruh ba ka la dei ka por ïa ka MBOSE ban pynlong compulsory ïa ka Logical Reasoning,General Aptitude bad General Knowledge naduh ki klas barit kine kiba dei ki bynta ha kino kino ki Entrance Test kynthup ïa kane ka CUET.
La plie ïa kane ka Program ai jinghikai da I Smt.L.M Synrem,iba dei I Head ka Education Department bad i la pdiang sngewbha ïa baroh khamtam ïa ki Nongwan ai jinghikai ba kynthup ïa Ms D.Lyngdoh Asst.Professor Department of History bad I Dr. Sylvia Badwar Asst.Professor, Department of Physics baroh arngut na Sankardev College kiba la ai ka jinghikai kaba paka halor ka CUET ryngkat ka Practical.
