Ai jinghikai ka Seng kynthei Nongthymmai 15mer ïa ki samla pule na ka jingktah u drok bad ki Social media

Nongpoh, Naiwieng 24 : Ban ai ka jingpynshai ne hikai ïa ki khun samla halor ka jingma ka juk mynta da ka jingkynrei ki Drok, ka shongkha khynnah bad ki jingsniew ba mih na ki Social Media lyngba ki Mobile Phone, ka Seng Kynthei ka Nongthymmai 14-15mer ha ka sngi Saitjaiñ ki la pynlong da ka prokram ai jinghikai ba kyrpang ha katei ka shnong kyrpang na ka bynta ki khun samla jong katei ka shnong.
Ha kane ka prokram ai jinghikai la wan shim bynta da u Bah Sosthene Sohtun MLA ka Jirang bad uba dei ruh u Myntri ka tnad C&RD ka sorkar kum u kongsan bad ka Kong Rona Khymdeit MDC ka Nongpoh kum ka symbut kongsan bad la sakhi lang ruh da ka jingdon lang ki Longkmie, ki riew rangbah bad kynthup ki khun samla katei ka Shnong.
Ha kane ka sngi, na ka liang ka Seng Kynthei ki la ai ruh da ki jingai sngewbha sha ki riew tymmen kynthup kynthei bad shynrang, nangta la leh burom ïa ki Nonghikai barim hapoh katei ka shnong, sha ki nogntrei ASHA bad Aganwadi kum shi bynta ban ai burom halor ki kam ba ki la shakri na ka bynta ka bha ka miat bad ka shongsuk shongsain ki paidbah nongshong shnong ha ki sngi bad ki snem ba la leit noh.
Ha kane ka sngi, ki la ban khia jur ruh ha ka jingai jinghikai halor ka jingma kaba ap ïa ki khun samla ba ki dei ban long kita kiba phikir khamtam ka jingkynrei u drok, ka jingshongkha khynnah, ka jingmlein ba sniew ba ktah lyngba ka Social Media ba kum ki samla ki hap ban long kiba skhem jingmut khnang ba kin nym shah ktah ha ka lynti ïaid jong ka jingim kum kita ki samla.
Haba ai jingkren ruh ha kane ka sngi na ka liang u Bah Sosthenes Sohtun bad ka Kong Rona Khymdeit, ki la ai ka jingïaroh ïa ka seng kynthei kiba la shim ïa kane ka bynta kaba khraw ban phai khmat sha ki khun samla lyngba ki lad ai jinghikai ba ki hap ban kiar rai maw rai dieng na ki jingmlien kiba sniew.
Shuh shuh, ha kane ka sngi ki la sneng la kraw ruh ba kum ki samla ki hap ruh ban nang kumno ban pyndonkam ïa ka Social Media, namar lada ki nang ban pyndonkam kin ioh jingmyntoi bad lada kim nang pat ban pyndonkam hok ka long ka jingjot ïa ki khun samla. Ki la ban khia ruh ïa ki samla ban kiar na kino kino ki jingmlien kaba sniew kaba ktah ïa ka imlang ka sahlang namar dei ki samla kiba ban tei ïa ka lawei ka shnong ka thaw bad lada ki ngop pat ha ki jingsniew ka long kaba eh ban tei ïa ka shnong ka thaw ne ka imlang ka sahlang, ki la bynrap.