Shillong, Naitung 27 : Ka District Legal Services Authority (DLSA), East Khasi Hills District ha ka jingïatreilang bad ka Meghalaya State Legal Services Authority ha ka sngi Thohdieng ka la pynlong ïa ka Orientation Programme halor ka Juvenile Justice (Care and Protection of Children) Act, 2015 ha Shillong Law College, Dhanketi, Shillong. Ha kane ka prokram naduh ki pulit, ki doctor, ki panel lawyer bad ki para-legal volunteer ki la shim bynta.
Haba kren ha kane ka sngi na ka liang ka Kong K.E Rymbai, JMCF/Principal Magistrate JJB, Shillong ka la batai lyngkot halor ki kam ba ïadei bad ki khynnah kiba don ha ki jingshah tyngkhuh bad ka aiñ bad ka jingshim ïa ka rai. Ka Kong Yophika Thabah, Assistant Professor, Shillong Law College ka la kren halor ka mat ka jingkloi ban ïoh ïa ka hok ha ka por ba shwa ba kin shah kem, ka jingshah kem bad shah bat hapoh ka Bharatiya Nagarik Suraksha Sanhita.
Katba u Bah B. Chyne na DCPU, Shillong u la pynshai haba ïadei bad ki khynnah kiba donkam ki lad sumar bad ki jingïada hapoh ka Juvenile Justice Act bad Dr T. Basaïawmoit, Psychologist, DMHO la kren shaphang ka bynta jong ka psychologist hapoh ka Juvenile Justice Act ha ka ban pynlong ïa ki jingkhmih ha ki por ba nyngkong. Katba ka kong S.A.M Nongdhar, DSP, East Khasi Hills District ka la banjur halor ka bynta ki pulit bad ki Special Juvenile Police Unit kaba hapoh ka Juvenile Justice Act, 2015.
