Jowai, Nailar, 19: Ka Dawki Police Station ha ka jingïatreilang bad ki ASHA Workers bad ka tnad ak koit ka khiah ki la pynlong ïa ka jingai jinghikai ha ka sngi Baar na ka bynta ban ïakhun pyrshah ïa ka jingbymman ïa ki kynthei kaba la pynlong ha Lamin Bazar bad ha Bakur kiba hap hapoh ka Amlarem Block, West Jaiñtia Hills District.
Ha kane ka prokram la wan ban sakhi lang da ki pulit, ki doktor, ki nongtrei ka koit ka khiah, ki ASHA bad ki nongïalam shnong kiba wan ban pyni ïa ka jingïatylli ban pynneh ïa ka jingshngaiñ jong ki kynthei ha ki shnong nongkyndong bad ki jaka khappud. Katba ïa jingïalang la pynïaid da u Sub-Inspector J.K. Majaw na Dawki Police Station.
Ha ka jingkren pdiang burom, u Officer-in-Charge jong ka Dawki Police Station ula kyntu ïa ka jingdonkam jong ka jingïatreilang lang bad ki paidbah ban tehlakam ïa ki kam bymman ïa ki kynthei. Ula pynpaw ruh ba ka jingdon jong ka Dawki kum ka shnong khappud ka wanrah shibun ki jingeh kum ka jingkhlad briew, jingwan thombor bad jingwan tuid ki nongwei, kumta ka donkam ban pyrkhing bha na ka bynta ka jingshngaiñ jong ki kynthei.
Ka ASHA Facilitator H. Swer na Mukhtapur Sub-Center ka la kren halor ka jingdonkam ban pynkhlaiñ ïa ka jingtip paidbah bad ki lad jingsumar ban tehlakam ïa ka jingbymman. Ka la kyntu ïa ki longïing longsem ba kin ym shu shong kli kti, hynrei kin ïa pyntip kloi lada don kino kino ki jingjia. Hadien kata, ka Women Police Sub-Inspector R. Suchiang ka la kren halor ka jingshngaiñ jong ki kynthei, ka bynta jong ki pulit bad ka jingdonkam ban tei ka jingngeit hapdeng ka imlang sahlang bad ki bor pahara.
U Dr. S. Khonglah na Dawki PHC ula ong ba ka jingsumar ha ka liang ka met bad ka mynsiem ka long kaba donkam eh na ka bynta ki kynthei, kumjuh ruh ban ïarap kumno ban pynkhlaiñ ïa ka jingmut jingpyrkhat. Katba u Dr. E. Khonglah na Pdengshakhap PHC u la pynsngew halor ka jingdonkam ban pynbit pynbiang ïa ki jaka ai jingsumar, khnang ban ïoh ïarap ïa ki nongpang ha ka por kaba biang.
Ka ASHA Baïahunlhang Khongsdier na Dawki ka la pynpaw ïa ka bynta jong ki ASHA kum ki nongai jingïarap ba nyngkong ïa ki kynthei kiba shah ktah bad kumjuh ka jingïarap ïa ki longïing. Kiwei de ki nongïalam shnong kiba ai jingkren ki la pynsngew halor ka jingkitkhlieh jong ki ban pynneh ïa ka jingshngaiñ jong ki kynthei. Katba u Secretary jong ka Lamin ma F. Dkhar ula pynshlur ïa ka jingdonkam ban pynkhlaiñ pat ïa ki rukom im bad jinghikai ban burom ïa ki kynthei.
La pynkut ïa ka jingïalang da ki kyntien ai khublei na u Sub-Inspector D. B.B. Tyngkan, uba la ai khublei kyrpang ïa baroh kiba la ïashim bynta. Ula pynshlur ruh ba ka jingïakhun pyrshah ïa ka jingbymman ïa ki kynthei kam dei tang ka kam jong ki pulit ne ka tnad ai jingsumar, hynrei ka dei ka jingkitkhlieh lang jong ki paidbah baroh.
Kane ka Awareness Program ka la pynpaw shai ba ka jingpynneh ïa ka jingshngaiñ bad ka burom jong ki kynthei ka long kaba lah tang lada ki pulit, ki nongai jingsumar, ki ASHA bad ki nongïalam shnong ki trei lang da ka jingïatylli bad ka jingïarap jong ki paidbah.
