Nongpoh, Ïaïong 08: Kum ka jingpynkhreh ne ka jinghikai ba ki paidbah kin dup tip kumno ban shim ïa ki lad jingïada lada khie jumai ne shah ktah ha u jumai, ka tnad State Dis-aster Management Autho-rity, Meghalaya ryngkat ka jingïatrei lang bad ka District Disaster Manage-ment Authority, ka ophis u Deputy Commissioner bad ka Umling C&RD Block mynta ka sngi ki la pynlong syndon da ka lad jinghikai ban pyni syndon da ki kam ba kin paidbah kin dup tip ban shim ïa ki lad jingïada lada khie jumai ne shah ktah ha ka jingpluh ding.
Ïa kane ka lad jinghikai ba la tip ruh ha ka ktien nongwei (Mock Drill) la pynlong ha Balawan College ha Umsning, ha kaba kane ka jinghikai ban shim ïa kita ki lad jingïada lane ban ïarap ïa kiba shah ktah ka dei halor ka jingktah jong u Jumai uba la kot sha kata ka 6.5 magnitude Richter Scale bad la shim bynta shitrhem ruh da kita ki kynhun ba hap ban ai jingïarap (Response Team) ha kaba lada peit ha ki khmat briew ka la long shisha thik kumba khie u jumai.
Ki kynhun bapher bapher (Response Team) naduh ka tnad ka koit ka khïah, ki pulit, ki kali pynlip ding, ki paidbah bad khamtam kito ki kynhun ba la pyntbid ha kane ka kam ban ai jinghikai na ka tnad Disaster Management ki la shim bynta ha ki kamram bapher bapher kumno ban ïarap lane leh lada don ki paidbah kiba shah ktah ne mynsaw haba khie u jumai.
Ha kane ka jinghikai ban tip ïa kita ki lad jingïada na ka jingshah ktah ha ka jingkhia u jumai la ïalam da u Incident Commander (IC), uba dei u BDO ka Umsning, u Raja Brahma, bad la bud ryntih ruh thik katkum kata ka Incident Response System (IRS) bad kane ka jingai jinghikai ka la long kaba jop ka dei da ka jingshim bynta lang ki nongtrei sorkar bad ki ophsiar na ki tnad bapher bapher ba kynthup na PHE, PWD, DPRO, Health, Veterinary, Police, Fire & Emergency Services, SDRF, NDRF, Dorbar shnong of Lum Roman village, bad ki samla pule ka Balawan College na Umsning.
Hadien ba la pyni paidbah ne hikai kumno ban ïarap ïa kiba shah ktah ha ka por ba khie jumai ne shah ktah ha ka ding, la pynlong sa ka prokram ban ai jinghikai pat sha ki paidnbah, ha kaba la shim bynta da u Additional Deputy Commissioner ka Ri Bhoi, u Bah M.B Tongper uba la kren bad kyrpad jur ïa ki paidbah ba ki dei ban pyndonkam ho kine ki lad ai jinghikai khnang ba kan long shisha ka jingmyntoi lada wan lynshop u jumai ne ka ding ha kano kano ka por ba ngi la tip ïa kita ki rukom ban ïada ïa lade bad ruh ban ïarap ïa kiwie kiba shah ktah.
La sakhi lang ruh ha kane ka sngi da ka jingdon lang u Dr. J.I Rapthap, Asst. Professor, Department of Adult & Continuing Education, NEHU, u Bah P.H Shylla, Divisional Commandant ka Home Guards, Dr. Graham Bell, Mabaniang na Civil Hospital Nongpoh, u S.Bordoloi, Senior Consultant, SDMA bad ruh u Bah J.P Lakiang, Executive Director SDMA, ka Kong M.Momin, MCS,EAC, ka Kong K.Wanniang DDMA bad kiwei kiwei de.
Baroh ki kiba la don bynta ha kane ka prokram ai jinghikai ki la shim bynta shitrhem bad dei lyngba ka jingdon jongki la pynlong ïa kane ka sngi kaba jop ba kumno ngin lah ban ïada ïa lade ne ban ïarap ïa kiwei lada don ka jingshah ktah ha ka jingkhie u jumai na ka jingshah ktah ha ka ding bad kiwei kiwei kiba ktah na ka bor mariang.
