Ai jaka ka Sorkar sha ki heh saipan ha Polo, byrthen ka KSU ban sei madan ïa ki jingshisha

Shillong, Risaw, 22: Ka Khasi Students Union (KSU) ka la byrthen ban sei madan ïa ka kyrteng jong ki heh saipan kiba la ïoh jaka na ka khyndew sorkar ha Polo, Shillong.
Ha ka jingïakren bad ki lad pathai khubor u President ka KSU u samla Lambokstarwell Marngar, u la ong, “naduh ka 18 tarik, Nohprah, 2024, ka seng ka la buddien da kaba pan ïa ka hok wad jingtip (RTI) na ka tnat Revenue hynrei kam shym la lah satia ban ai ïa ka jubab kaba shai.”
“Hynrei katkum ka jingsngewthuh jong ngi, kato ka jaka (ha Polo ba la ker da ki tin blue) ka la don ka jingïaleh mukotduma hapdeng kawei ka kur bad ka Sorkar, ngim da kynmaw shuh ïa u snem bad ngi dang wad ïa ki kot jingpynshisha bad ka ïingbishar ka la pynksan ba ka dei ka jaka jong ka Sorkar,” la ong u President ka KSU.
U la ïathuh katba ka seng ka dang wad ïa ki kot ki sla, ka la ïoh ïa kawei ka Office Memorandum ha u snem 1998 ba la pynmih da ka Sorkar kaba ong ki jaka sorkar ym lah shuh ban ai sha ki riewshimet lait noh ki leh ïa kino kino ki kam kiba pynmyntoi ïa ki paidbah.
“Hynrei, ñiuma kumba ngi tip mynta, ka sorkar ka die ne ka ai ei ruh ïa kata ngim tip sha ki katto katne ki heh saipan ka nongbah Shillong. Ka jingkylli ka long hato ïa ki jaka sorkar yn shu lilam lut, hato ïa ka jaka sorkar yn shu ai lut sha ki bym dei ban ai,” la buh jingkylli u President ka KSU.
U la ong ba ka seng ka khmihlynti ïa ka Sorkar ban shna da ki ïing na ka bynta kiba duk ne da ka hostel na ka bynta ki samla kiba wan na ki district bapher bapher ban pule ha nongbah Shillong.
“Hynrei kumba ngi ïohsngew ka Sorkar ka la ai sha kita ki briew (heh saipan). Ngi dang ïai pyrshang ban tih bniah ïa kata ka kam haduh ba ngin da ïoh ïa ka jingshai ba paka, hynrei kaba kongsan ka long ba ka sorkar ka hap ban jubab ban pynshai sha u paidbah,” la ong u samla Marngar.
Haba buh jingkylli shuh shuh u la ong, “kaei ka jingthmu ba la ker da ka tin blue ïa kato ka jaka, kaei ka jingthmu kaba don sha lyndet. Ngi khmihlynti ba ka Sorkar ka dei ban pynshai sha ki paidbah halor ka nongrim ba ka don lypa ka Office Memorandum ne ka sorkar ka la leh thymmai da kawei ka Office Memorandum ruh ïa kata ngim lah ban tip. Ki jaka sorkar ym dei ban shu lilam shano shano hynrei ban pyntreikam na ka bynta ka jingmyntoi jong ki paidbah bad khamtam kum ka Sorkar u paidbah ka dei ban leh ruh ïa ki kam kiba ai jingmyntoi ïa u paidbah.”
U la ïathuh ruh ba ka seng kan sa pyndonkam da kiwei ki lad ki lynti watla ka tnat Revenue jong ka sorkar kam shym la lah ban ai ïa ka jingpynshai ba thikna khnang ban ïohi bniah ïa ka rai ba ka Ïingbishar ka la pynksan ïa ka sorkar. “Ynda la ïoh lut ïa ki kot ki sla baroh ngin sa nang pynshai shuh shuh sha ki paidbah,” u la bynrap.
“Teng teng i kumba ka Sorkar kam pyrkhat ïa ki paidbah hynrei i kumba ka kwah ban pynsngewbha ïa ki katto katne. Ngim tip ki don jingïadei aiu bad ka sorkar hynrei lada ka long ha kane ka rukom nga sngew ba kiba leh bad kiba donkti halor kane kin hap ban shim ïa ka jingkitkhlieh,”la ïaiban u samla Marngar.
“Katkum ka jingïoh jingtip ma ngi wur wur wer wer, ki donkti ruh ki ophisar trai ri trai muluk. Ngi dang sngew shngaiñ ba ki don ki paradoh parasnam kiba don ha ka shuki ban long ki nongïada, lada ka long ha kata ka rukom ba ki don ka jingïasylla nga sngew tieng ba ki paradoh parasnam ki long pynban ki nonglilam ïa ki jaka ki puta,” u la ong.
Haba kylli, u la ong ba ka seng ka dang wad bniah ïa ki kyrteng (jong ki heh saipan) bad pynthikna ruh ba ka Sorkar ka ladep ai ïa ka jaka sha ki katto katne ngut ki heh saipan kiba don ha nongbah Shillong.