Shillong, Nohprah 19: Ka Sorkar Jylla ha ka sngi Thohdieng, kala aiti ïa ka jaka ha rud pung Umiam ban tei ïa ka Taj Umiam Resort & Spa- ka five-star luxury resort ba 330 klur tyngka.
U Myntri Rangbah ka Jylla Conrad K Sangma ula ïadonlang ha kane ka jingaiti ïa ka jaka ha ryngkat u Myntri kam jngohkai Timothy D Shira, Myntri ka tnad GAD Bah Sosthenes Sohtun, Chairman ka MTDC Marthon Sangma lem bad kiwei ki heh Sorkar.
Kane ka five-star luxury Resort kan dei ka project pynbiang ïing basa kaba hehduh ha Meghalaya.
Haba pynkynmaw ïa ki jingïohi jngai jong u Myntri Rangbah barim (L) PA Sangma, u Conrad ula ong ba ha ki Snem 1988, u (L) PA Sangma ula pynwandur ïa ka pung Umiam kum ka jaka wankai ba hakhmat eh ïa ki nongjngohkai, bad buh nongrim ïa kiba bun ki jingtei ba ïohi mynta.
“Kaei kaba ïohi jngai da ki phew Snem mynshuwa la pynwandur ïa ka ha kawei pat ka kyrdan mynta” ula ong.
Haba pynpaw ïa ka jingsngewnguh, u Myntri Rangbah ula ai khublei ïa u Myntri kam Jngohkai, ki Ophisar ka Tnad, MTDC bad baroh ki Kynhun ba don bynta namar ka jingpyrshang ba khlem thait ha kaban pynurlong ïa ka jingïohi jngai sha kaba jia shisha.
Da ka jingaiti ia ka jaka ban tei ïa ka Taj Umiam Resort &Spa, ka Shillong kan don mynta haduh saw tylli ki nongkynti five-star, ha kaba artylli kila treikam bad kawei ka ban dang mih. Ka jingwan jong ka Taj Brand ha Umiam lah khmih lynti ba kan wanrah jingkylla ha ka thaiñ, kan plie lad shibun ha ka ïohkam ïohjam, pynkhlaiñ kamai ïa ki nongkhaïi trai Jylla bad nang pynkhlaiñ ïa ka kyrdan ka Meghalaya kum ka World-class Tourism Destination.
“Kane ka dei tang ka jingsdang” ong u Myntri Rangbah bad bynrap “Da ka jingbei pisa ha ki kam kiba dei, ka jingïashim bynta lang ki paidbah bad ka plan ba ïohi jngai, ka kam jngohkai kan ïai long ka engine ka roi ka par ka ban pynmyntoi ïa baroh ki nongshong shnong ka Meghalaya”
Ula ong ruh ba kane ka kam kan dei ka jingsdang ba thymmai ha ka lynti ïaid ki kam jngohkai. ” Ka Meghalaya ka pdiang kumba 16 lak ki nongwankai ha u 2024, bad ngi antad ban tam ïa ka 20 lak ka jingwan ki nongjngohkai hapoh u 2028. Da ka jingdon ïa palat 300 tylli ki jaka jngohkai, ka kolshor kaba riewspah bad ka spah mariang ka bym lah ïanujor, ka Jylla kala nang paw kum ka jaka jngohkai ba khring bha hapoh ka ri bad ha ka pyrthei” ula ong.
Ula pynpaw ba naduh u Snem 2018, ka kam jngohkai ha Meghalaya lah ïohi ba kala roi khlem sangeh bad mynta la ïathuh kum ka karkhana, kaba nang pynsuk ban khring ïa ka jingseng kam bad ïatehlok. Ka kam jngohkai mynta ka synñiang haduh 7.7 % sha ka GDP ka Jylla, da ka thong ban kyntiew sha ka 8.8% hapoh u 2032.
U Myntri Rangbah u pyntip ba ka Sorkar Jylla kala pyntreikam haduh 254 tylli ki project kam jngohkai ba shongdor haduh T.3,914.51 klur ba kynthup ia ki ïing basa, ki jaka jngohkai bad kiwei kiwei.
Napdeng kine, 26 tylli ki jingtei kiba heh ba shongdor palat 1400 klur tyngka kynthup ka Shillong Ropeway, Mawkdok Skywalk, Meghalayan Cave Experience Centre ha Mawmluh, bad ka Rain & Bamboo Interpretation Centre ha Mawsynram.
Haba kren halor ka jingkongsan ka Umiam, u Myntri Rangbah ula ong “ka Umiam ka dei ka jaka ba nyngkong eh kaba pdiang ïa ki nongwankai sha Meghalaya, tang 17 km na Shillong bad 14 km na Umroi Airport, ka dei ka khyrdop sha ka Jylla bad kan shim ïa ka jaka pdeng ha ka plan ka roi ka par”.
Palat 500 klur tyngka la mang ïa ki kam pynroi ïa ka Umiam kynthup ka Taj Umiam Resort &Spa, ka Luxury Cottage hapoh ka PPP, shna pynitynnad shuh shuh ïa ka pung Umiam hapoh ka SASCI Project, ka Convention Centre, ki jingtei ba donkam jong ka Water Sports bad kiwei kiwei.
Hapoh ka CM-Meghalaya Homestay Mission, ka Sorkar kala ai haduh 70% ka subsidy ban shna ïa ki homestay. Ka bynta bala dep ka kyrshan haduh 800 tylli ki homestay, kaba aikam haduh 1600 ngut bad kane ka mission ba mynta ka thmu ban pynkha sa 3000 tylli ki homestay hapoh u 2028.
U Myntri Rangbah ula kren ruh halor ka jingjop jong ka Meghalaya Concert Economy, kaba hapdeng u Snem 2024 bad 2025, kala khring haduh 3.86 lak ki nongwan sha ki 7 tylli ki concert kiba hehduh. Ka jingkynshew pisa ba 23.5 klur tyngka kala pynmih haduh 133.42 klur tyngka, bad aikam haduh 5500 ngut ki briew ha ka shisngi bad ai jongmyntoi shikatdei eh ïa ki samla, ki trai hotel, homestay bad ki dukan ba buh da ki longkmie.
Halor ki lad pynïasoh, ula ong ba ka jingpynjanai ka dang dei ka Kam kaba hakhmat eh, da ka jingdon ki surok kiba bha, ka jingpynheh iïa ka kad liengsuiñ bad ka jingpynpoi surok sha ki jaka ba kyndong eh.
