Khliehriat, Nailur, 26: Ka ophis jong u District Medical & Health Officer East Jaiñtia Hills District mynta ka sngi ka la pynlong ïa ka prokram ba kyrpang ha Khliehriat ha kaba ïadei bad ka jingrakhe ïa ka taïew ba kyrpang ka World Rabies Week 2025, ïa kane ka taïew jingrakhe la pynkut ruh mynta ka sngi da ka jingïaid rally ha Khliehriat ba da ka jingialang ha Conference Hall jong ka Wika Guest House, ha Khliehriat ba la iashimbyta lang da ki khynnah skul.
Kiba la ïa don lang ha kane ka prokram ki kynthup u Additional Deputy Commissioner, East Jaiñtia Hills District, u S. R Marak, MCS, u District Surveillance Officer, East Jaiñtia Hills District, Dr L. Sungoh, District Veterinary Officer, East Jaiñtia Hills District, Dr M. Lamare, u Principal Jaiñtia Eastern College (JEC), Khliehriat, Dr P. Nongtdu, ki heh sorkar kiba na ka tnat ka koit ka khiah, ki nonghikai bad ki khynnah skul.
Haba kren ha ka jingïalang, u ADC, S. R Marak, MCS u la pynpaw ka jingsngew nguh bad ai ka jingiaroh ïa ka ophis jong u District Medical & Health Officer, East Jaiñtia Hills District kaba la pynlong ïa kane ka prokram bad ong ba kane ka prokram ka dei ruh kum ka jingpynshai paidbah ne ka awarenedd sha ki paidbah nongshong shnong ba kin tip ïa ka jingpang kaba mih na kaba shah dait ha ki ksew ne ka Rabies kaba dei kaba ma bha khamtam haba shah dait ha ki ksew lamwir bad u la pynsgew ruh ïa ka jinglap jong u hi shimet na kaba shah dait ha u ksew bad kumno ka ktah ïa ka met lada ym ai ïa ki injek Anti-Rabies Vaccination bad u kyntu ïa ki khynnah skul kiba ïa shimbynta lang ha kane ka prokram ba kin pynsaphriang ïa kane ka khubor sha kiwei ruh kiba dei ki paralok bad sha ki nongshong shnong ba kin tip ïa ka jingma kaba ap na kaba shah dait ksew lada kim shim jingsumar kloi.
U District Surveillance Officer, East Jaiñtia Hills District, Dr L. Sungoh u la kren shaphang ka jingmih na ka jingshah dait ksew bad ong ruh ba lada don mano mano ban shah dai ksew ki dei ban shim kloi ïa ki lad jingiada ban lait na ka jingma kaba ap kaba lah ban ktah ïa ka koit ka khiah kaba lah ruh ban lam sha ka jingiap kumta u kyntu ba donkam ban shim kli-kloi ïa ki lad jingiada ban pyniap noh ïa ka bih ne ïa ki khniang virus kiba lah ban kath ïa ka met.
U la ong ruh ba donkam ban sait da ka um bunsien na ka jaka ba shah dait ksew haduh ba kin da poi sha ki jaka ai jingsumar ha ki hospital ha kaba donkam ban sumar da kaba ai full dose ïa ki injek vaccination bad kane ka jingpang Rabies ka ktah ïa ki briew lada ki shim sting ban shim ki lad jingsumar lada shah dait ha ki ksew.
Kum ka jingpynshai ne jingpynbna sha baroh ki paidbah kaba long kum ka awareness ha kaba iadei bad ka jingpang na kaba shah dait sew ne Rabie, mynta ka sngi ka la don ka jingiaid rally ha surok bah national highway ha sor bah Khliehriat kaba la sdang ban iaid na ka pjyllaw jong ka ophis jong u District Medical and Health Officer (DM&HO), sha phyllaw ka ophis u Deputy Commissioner bad phai biang ssha ophis u DM&HO ha kaba la rah ruh ïa ki baner ki placard kiba don ki jingthoh bapher bapher kiba long kum ki jingai jingtip sha ki paidbah shapang ka jingpang Rabies.
Ha kine ki sngi jong ka taïew ba rakhe ïa ka World Rabies Week ka tnat DM&HO Khliehriat ka la ioh ban pynlong ruh ïa ka jingiakop ha ka dro dur, ka jing ïa pyni nia ne ka Debate, ki jingailehkai Skit bad ka jingaiamareh Marathon ba la ïa shm bynta da ki khynnah skul.
Kumjuh ruh ka ophis jong u District Animal Husbandry & Veterinary Officer, East Jaiñtia Hills District ha ryngkat ka jingiatreilang bad ka ophis Meghalaya Veterinary Services Association (MVSA) Jaiñtia Hills District Unit ka la pynlong ïa kane ka prokram World Rabies Week ha kaba la pynlong ruh ïa ka jingai injek ïa ki ksew ka Anti-Rabies Vaccination Drive bad ïa kane kawei pat ka prokram la pynlong ha C& RD Block Veterinary Dispensary, Khliehriat bad kane ka dei ruh halor ka jingtmu ban pynsaphriang ïa ka khubor sha ki nongshong shnong ba kin don ka jingiatreilang ban rat dyngkhong ïa ka jingpang Rabies bad la ai injek ïa ki lai tylli ki ksew kiba la kynjoh 3 bnai shaneng ha ka kyrta jong ki.
Lah ban bynrap ba ka phang pdeng jong ka jingrakhe World Rabies Week ka pyn phalang ba ka koit ka khiah jong ki briew, ki mrad bad ki sawdong sawkun ki don ka jingiadei bad da ka jingiatreilang yn lah ban rat dyngkhong ïa ka jingpang Rabies.
