Nongstoiñ, Naitung, 17: Haba kren ha ka jingïalang jong ka prokram thung dieng jong ka Seng ki trai Khlaw trai Khyndew dong Nongstoiñ, kaba la long ha shnong Mawlangdep West Khasi Hills ha ka sngi Palei, u MDC ka Nongstoiñ Constituency Dr. Juristman Ïawphniaw u la ong, “haba ngi ai sha ka mariang ïa kaba bha tam lyngba kum kine ki program thung dieng, ngin ïoh pdiang ruh ïa ka bha tam na ka mei mariang”.
Na ka liang u MDC u la ong ruh, “Kane ka sien jam ba kane ka seng ka la shim ka long kaba donkam eh bad ka ban ïarap ruh ïa ki longdien man dien jong ngi, ba kumno ngin nang ban pynneh pynsah ïa ki khlaw ki btap ki jong ngi, ha kaba ki siem ki don ha kine ki jaka jong ngi kin ïaineh”, bad bynrap, “Ka shong ha ngi kum ki nongshong shnong ban sumar lym kumta ka long lehnohei lada ngi jied ban pynjot noh ïa kane ka spah marïang kaba u Blei u ai ha ngi”.
“Ha kum kane ka sngi ba ngi kynmaw ieit ruh ïa ka jingkhlad noh jong u Syiem Tirot Singh, u ba la ïakhun pyrshah ïa ka sorkar phareng ban pynneh pynsah ïa la ka jong ka khyndew ka shyiap. To ai ba ma ngi ki longdien haba ngi shim ïa kane ka bynta ban thung dieng, ai kan long ka jingkyrkhu bad ka jingmyntoi na ka bynta ka jingpynbha pat ïa ka mariang bad na ka bynta ki pateng ban wan”.
“Ngi dei ban sngewthuh ba kiwei ki briew na ki jaka ri thor ki da wan khnang sha kane ka jaka jong ngi tang ban ïoh lyer pyngngad. Ka jingnguh ka long sha u Blei u ba la ai ha ngi ïa kane ka ri kaba itynnad bad kaba pyngngad. Ka donkam ïa ngi ban sngewthuh pat kumno ban ïada ïa ka ym ban pynjot noh”, u la ong.
Kiwei pat kiba la ai jingkren lyngkot shwa ka prokram thungdieng ki kynthup ïa I kong Lila Nongkhar, u Bah E.Thongni u ba dei u Secretary seng trai khlaw trai khyndew dong Nongstoiñ bad u secretary shnong Mawlangdep Bah D.Nongspung.
Hadien ka jingkren la ïashimbynta da baroh ryngkat ki rangbah, ki samla kynthei bad shynrang ban thung ïa ki tynrai dieng Kreit, Ngai, Sohphan, Sohlait, Tanglung bad kiwei pat, ha ka jaka kaba mar pyrshah bad ka pyntha kaba heh bha ha ka thaiñ Mawliehbah.
