Ai dorkhas ka MSA ban kyrpad na ka bynta ban pynthymmai bad pynïar ïa ka Indoor

Mawkyrwat, Ïaïong 22: Hadien ka jingwan jong u slap, ka lei lieh bad ka lyer kaba jur ha kine ki kyndiat taïew ka la don katto katne ka jingshah ktah jong ki ïing ba ki briew ki shong ki sah, ki dukan bad kumjuh ruh ïa ka Mawkyrwat Indoor Hall kaba don ha shnong Mawkyrwat, South West Khasi Hills District hajan ka State Bank of India Mawkyrwat Branch ha kaba ka la shah lit ïa ki bynta jong ki jingtap ne ki tin.
Halor kane ka jingshah ktah jong ki bor ka mariang ïa kane ka Mawkyrwat Indoor Hall, u Myntri ba dei peit ïa ka kam ïalehkai jong ka jylla Meghalaya, u Banteidor Lyngdoh ha ryngkat u MLA ka Mawkyrwat Constituency, u bah Renikton Lyngdoh Tongkhar uba dei ruh u Myntri ka tnad Umbam Umdih jong ka jylla ha ka 21 tarik u Ïaïong, 2022 ki la hiar ban jurip ïa katei ka Indoor ha ka jingsynranlang jong ki nongkitkam jong ka Mawkyrwat Sports Association (MSA) ba la lam khmat da u Galvender Marbaniang kum u President bad u Elevenson Wanniang kum u General Secretary.
Shuh shuh ha kane ka sngi na ka liang ka Mawkyrwat Sports Association (MSA) ka la ai ruh ka dorkhas sha u Myntri ba dei peit ïa ka kam ïalehkai jong ka jylla Meghalaya ban pyntip bad pyni halor ka jingshah pynjulor jong ka Mawkyrwat Indoor Hall khnang ba un sa shim khia bad leh ïa kaba donkam nangne shakhmat.
U bah Banteidor Lyngdoh, Myntri ba dei peit ïa ka kam ïalehkai jong ka jylla Meghalaya haba kren ha ki lad pathai khubor hadien ka jingleit jurip ïa kane ka Indoor Stadium u la ong ba kam dei ba un shu wan ban peit kai ïa kane ka jingshah pynjot ha ki bor jong ka mariang, hynrei na ka liang jong u kum u nongpeit nongjngoh ïa ka kam ïalehkai hapoh ka jylla Meghalaya un sa shimkhia bad u la kubur da kaba kular ban thaw ki lad ki lynti ban phah maramot noh mardor khnang ba kan nym long ka jingduhnong na ka bynta ki khun samla jong ka shnong ka thaw bad kumjuh jong ka distrik hi baroh kawei kiba don ka sap ha ki kam ïalehkai.