Nongpoh, Ïaiong 22: Ka Hynniewtrep Live Fish and Fish Seeds Supplier Association ka ba dei ka kynhun kaba ju mih sha khmat ha ki kam shakri paidbah khamtam na bynta ka bha ka miat jong ki paradoh parasnam ki ba ju Ri bad shalan Dohkha symbai, ha ka sngi ba-ar katta ha 19th Ïaiong 2022 hapoh ka jingïalam u samla Aristone Manbha Ryngdong Sngi kum u President bad u Bah Estarius Marbaniang kum General Secretary, ki la leit ban buh ïa ka Dorkhas ha khmat u President Rangbah jong ka seng Khasi Students’ Union, Sengkmie.
Kum ka kynhun ka don ïa ka jingangud bad ka thong ban shakri bad kyntiew ïa ki paradoh parasnam ha bun ki liang khamtam kyrpad ha ka kam Ri bad shalan dohkha katkum ka jingstad saian jong ka juk kaba mynta, ka mei-ram-ew jong ka Bri u hynniewtrep khamtam ka them Ri-Bhoi ka long ka ba biang bha na bynta kane kam
Kumba la pyntip da u Samla Aristone Manbha Ryndong Sngi u la png ba ka Asscoation ka la ju tip bad shakhi naduh ka mynor ba ka Bri u Hynniewtrep ka dei ka ba Seisoh, ka jingkylli mynta ka ka long ba ngi duk, kane ka jingkylli kum ka jaitbynriew ka donkam ban sngewthuh, u la bynrap.
U la ong ruh ba shibun ki samla ki la sdang ban sngewthuh bad khein kor ïa kane ka kam Ri bad shalan dohkha kum ka lad seng kam sengjam ba ieng ha la ki jong ki kjat, hynrei katta nang mih ki sngi ki ïa ki paradoh parasnam ki sdang ban jah suki suki, kum ka kynhun ka wad ïa ka daw katkum ka jinglap ka dei ka jingwan ban knieh jar jar lane ka jingiuhroit bad ka jingtlot ki bor jong ka ain ba dei khmieh ka long pynban ka kabu ksiar ka ba plie lad ïa ki mynder, kum u bsein ha ba u bam u sdang shwa na khlieh bad ki tdong ki kyrthad bad ki jah man ka sngi,
U la bynrap ruh da kaba ong ba kumjuh ka jingiuhroit ki mynder ka jinghiardor ki paradoh parasnam. Ka Ri khasi ka dei ka Ri Um snam, ka dei ka Ri kaba ki kpa thymmen jong ngi ki la thied rem ïa kine ki lum ba itynnad, kum ki khun u Hynniewtrep u wei pa uwei lane kawei pakawei ki don ïa ka hok bad ka dei ruh ka kamram ba peit pyrman na ka jinglynshop ha ba wan pynjot ki ba nabar, ka khaii snaïap lane ka benami, ka jingleh mynleh ki bar jylla kum ki nongtrei bylla ka dei kawei ka ba ktah bha kaba pyntroin ïa jong ka jaitbynriew kaba la donkam banweng mardor.
U la pynpaw ruh ba ka benami ka pynjot ïa ka jaitbynriew, la kumba pynlip ïa ka ding da ka petrol, kumjuh ki ba leh benami ki dei ban tip lane sngewthuh ba la da kan klang ka ding ka jingjot ka dei ka jong ki nongleh.
Ka Association ka la pyntip ba u Presi dent ka KSUsamla Rangbah Lambokstar Marngar la ïaroh ïa ki sienjam ba ka Associa tion bad u la kular ha ba ka Association ka kynduh ïa kano kano ka jingeh ka seng ka long kaba la kloi ban kner ïa ki kti na bynta ka bha ka miat jong ki paradoh parasnam ha baroh ki liang, ong u Samla Aristone Manbha Ryngdong Sngi, President ka Hynniewtrep Live Fish and Fish Seeds Supplier Association.
Shuh shuh, u Nongïalam ba rangbah ka Seng KSU u la kular ruh ba ki shnat treikam ka seng ki long ki ba peit pyrman bha bad kan leh ïa ka ba donkam, u la kyntu ruh ïa baroh ki Dorbar Shnong ba kin sngewbha ban ai ka jingïatreilang bad ki shnat treikam ka KSU ban plie lad lane pynshlur ïa ki paradoh parasnam ban ki mih sha khmat ïa kane ka kam ym ban ailad ïa ki briew kiba nabar ka jylla ban shu wan kjit ei ïa ka spah jong ka jylla, ong u Samla Aristone Manbha Ryngdong Sngi.
