Khliehriat, Nailur, 26: Ka CSR jong ka Star Cement Lumshnong ha ka sngi Palei bad sngi Thohdieng ka la sam dawai ei sha ki paidbah nongshong shnong jong ka shnong Lumshnong bad shnong Brichyrnot East Jaiñtia Hills District ha kaba ka la don ruh ka Eye bad ENT Screening Camp bad 330 ngut ki nongshong shnong na kitei ki shnong ki la ioh jingmyntoi na kine ki prokram sam dawai ei.
Ki la don 221 ngut kiba na shnong Lumshnong kiba la ïa poi sha kane ka prokram sam dawai ei ba la pynlong hynnin ka sngi ha Lumshnong Community Hall bad 109 ngut pat kiba na shnong Brichyrnot ki la poi sha ka Health Camp ba la pynlong mynta ka sngi ha RCLP School ha shnong Brichyrnot, la ong ba ha kine ki health camp ki la wan ban leh ne pynïaid da ka kynhun Eye Specialist kaba na Reyan Eye Care Centre, Shillong bad ha kaba ïadei bad ka ENT pat la pyniaid da ki doctor General Medicine (MD) Specialist kiba na Jowai, na Khliehriat bad na Lumshnong PHC.
Ki nongshong shnong kiba na Lumshnong bad na Brichyrnot kiba la poi sha ki Health Camp ki la pynpaw ka jingsngew nguh ïa ka Star Cement lyngba ka CSR kaba ju shim khia na ka por sha ka por ha kaba ïadei bad ka koit ka khiah jong ki nongshong shnong da kaba pynlong ïa ki prokram sam dawai ei lyngba ki Free Health Camp ba pynlong ha ki shnong.
