Ai burom u Dy.CM ïa ka jingnoh synniang ki ksew K9 ban ïakhun ïa ki kam pyntriem

Shillong, Rymphang 28 : U Symbud Myntri Rangbah ka Jylla ba peit ïa ka tnad Kampohiing ka Jylla, Bah Prestone Tynsong ha ka sngi Saitjain u la ai burom ïa ka jingnoh synñiang jong ki ksew pulit ne ki ksew K9 ha ka jingïakhun pyrshah ïa ki kam pyntriem la ka long naduh ka jingïakhun ïa u drok, nangta ïa ki tiar pynbthei bad ban thwet ruh ïa ki nongkam bymman.
Ïa kane u Symbud Myntri Rangbah u la kren ha 1st MLP Battalion Mawiong, ha ka jingïalang pdiang burom ïa ka kynhun jong ki 24 tylli ki ksew K9 thymmai bad ha kajuh ka por ka jingpynkup burom kaba shongkun ïa ki lai tylli ki K9 kiba la shongthait noh hadien ka jingshakri ïa ka ka tnad pulit da ki bun bun snem.
“Naduh ba la seng ïa ka ha u snem 1975 hapoh ka CID Wing, ka kynhun pulit Meghalaya K-Nine ka la long u mawjam ba donkam eh ha ka kam pahara. La san phew snem, ki kynhun K-9 bad ki nongsynran (handler) ki la long ka bynta ba nyngkong eh jongngi ban ïakhun pyrshah ïa ki kam pyntriem bym lah ban ïohi, ki kam buhrieh jong ki nongkhaii drok bad ki kam sniew kiba dei bad ki tiar pynbthei. Ha une u snem ba la dep, ka kynhun ka la ïoh ïa ki jingjop kaba khraw ha kylleng ki district ha ki kam ban ïada ïa ka jingim bad pynneh ïa ka shongsuk shongsaiñ jong ki paidbah,” u la ong.
U Symbud Myntri Rangbah u la ong ruh ba kine ki ksew ba kyrpang jong ka tnad pulit ki don ka bynta kaba khraw bad borbah bha ban ïakhun ïa ki tiar pynbthei ha ki riat ba jylliew jong ka East Garo Hills, South Garo Hills bad West Garo Hills. “Ki K9 jong ngi ki la sma dien bad thwet wat ha ki jaka kiba triem bad syier bad kiba don beit ha ka jingma hynrei ki tur khlem salia,” u la bynrap biang.
Haba kren pat halor ka jingïakhun pyrshah ïa u drok, u Symbud Myntri Rangbah u la ong ba da ka jingdon jong ki K9 la lah ban pynhkhlain shuh shuh ia ka jingthwet ïa kiba donkti ha katei ka kam.
“Ka jingjop kaba khraw jong ki ka dei ha Ri-bhoi district ha u snem 2023 da kaba ïoh kurup ïa u drok heroin uba shongdor 5 klur tyngka bad kumjuh ka jingïoh kurup dang shen ïa u drok 691.54 gram ha Shillong, tang mynta u snem ka kynhun K9 unit ka la pynpaw pyrthei ba ym don satia ki bor kiba lah ban lait na ka jingpeitngor jong ki.
Ha kane ka sngi ka tnad pulit ka la pyni ruh ïa ka jingtbit jong kine ki ksew ha kaban sma dien ïa ki tiar pynbthei, ki drok bad kumno ban ïakhun pyrshah ïa ki briew ha ka jingïakhun jong ki ïa ki kam bymman.
U Bah Prestone u la ai ruh ka jingïaroh ïa ki nongsynran jong kine ki K9 da kaba ong ba kim dei shuh tang ki nongsynran hynrei ki la dei ruh ki dkhot ba kyrpang kiba donkam ka jingïatreilang ryngkat ryngkat ha kino kino ki kam ban ïakhun pyrshah ïa ki kam bymman.
La donlang ha kane ka sngi naduh ka DGP Kong I Nongrang nalor kiwei kiwei ki heh pulit.
Ki nongïashim bynta baroh ki lah ïoh ban ïaid sha ki jaka pyni ïa ki kam ba pher bapher ba la leh da ka NESFAS bad ki shnong. Ha kane ka jingrakhe, la pyni ruh ïa ka jingïashim bynta kaba itynnad jong i Kenet Lyngdoh lyngba ka band Meghalaya Grassroots Music Project (MGMP), kaba la pynsngewtynnad bad pynshongkun ïa ki nongwan jingïashim bynta baroh.