Ai burom u Bah Paul ïa ki kmie ki kpa ba pass bha ki 116 ngut ki samla pule na Constituency
Shillong, Naitung 20: Ki la don haduh 116 ngut ki samla pule kynthup naduh kito kiba pass bha ha ka klas 10 ter ter haduh PhD kiba la shah pynkup burom kyrpang ha ka West Shillong Constituency Committee hapoh ka jingïalam jong u MLA ka thain Bah Paul Lyngdoh uba dei ruh ha kajuh ka por u Myntri ha ka sorkar jylla.
Kiba ïoh pdiang ïa katei ka khusnam ki hap ban ïoh 80 na bynta ki khynnah klas 10, nangta 75 persen na bynta ki klas 12 bad 70 persen ha ka Degree. Ïa kane ka jingpynkup burom la pynlong ha Dinam Hall, Jaiaw ha ryngkat ka jingdonlang ki kmie ki kpa bad ki bahaiing hasem jong ki samla pule.
Na kitei ki 116 ngut, haduh 58 ngut kidei ha ka klas 10, 34 ngut ha ka klas 12, nangta 9 ngut ha ka Degree bad lai ngut ha ka Master Degree bad iwei pat ha ka PhD.
Ha kane ka janmiet, u Bah Paul u la pynkup burom kyrpang ruh ïa u Bah Riky Pathaw uba la don ka bynta kaba khraw ban pyndep ïa ka jinglehniam ba khatduh ïa kiba spah ngut ki nongshong shnong ka jylla kiba khlad na ka jingpang COVID ha ki khyndiat snem mynshwa.
Nalorkine, la pynkup burom ruh ïa ki khynnah bad ki samla kiba la wanrah ka nam bad ka burom ïa ka thain bad ka constituency ha ki kam ïalehkai bad ruh ha ka rwai ka siaw.
Da kaba ïaroh ïa ki samla pule kiba la aiti met bad mynsiem ha ki jingpule, u Bah Paul u la ong ba u sngewkmen ban ïohi ba na ka constituency ki la don bun ki khun samla kiba la nang la stad.
Ha kajuh ka por u la ai ka jingkhublei ïa ki kmie ki kpa kiba long ki païa ba skhem ban kyrshan bad ai mynsiem ïa ki khun ba kin leh bha ha ki jingpule jong ki.
U MLA u banjur ruh ba ki samla pule ki dei ban long kiba pynkhreh ban don ïa ka mynsiem ïakhun khamtam ha kane ka juk ba ki hap beit ban mad shibun ki jingtynjuh bad ki jingïakhun ban poi sha ka thong.
Nangta u ong ruh ki samla pule kim dei ruh ban don ïa ka mynsiem sngewsarong hynrei ban ïai bteng ban leh bha bad ba kin shim ruh ïa katei ka jingpynkup burom kum ka jingai mynsiem ba kin lah ban leh bha shuh shuh nangne shakhmat.