Shillong, Nailur: Ka Departmentof Tourism and Travel Management jong ka skulbah ICFAI University, Meghalaya ha ka sngi Baar ka la rakhe ïa ka World Tourism Day, 2022 halor ka phang, “Rethinking Tourism” ha ka shnong Nongjrong, East Khasi hills District.
Ha kane ka sngi, kane ka skulbah ka la pynlong ïa ka prokram kaba kyrpang kaba ïadei bad ki kam jngohkai pyrthei ha kaba la sakhi lang da ka Vice Chancellor ka skulbah ICFAI ka Dr. Alicia Gatphoh, u Sordar Shnong u Bah Pynshaiborlang Synjri, ki rangbah dong, ki nongshong shnong, ki khynnah skul jong ka shnong bad ki samla pule jong ka skulbah ICFAI.
La pynshongkun ïa kane ka jingrakhe da ki jingshad, ki jingrwai na ki samla pule jong kane ka skulbah bad na ki khynnah skul jong ka Nongjrong Government Lower Primary School, na ka Church of God Secondary School, Nongjrong, na ka Nongjrong Upper Primary School bad na ka Childrens Club, Nongjrong.
Hadien kane ka Vice Chancellor ka la plie pyrda ïa u mawnongrim kum ka dak ban kyntiew ïa ki kam jngohkai pyrthei ha ka shnong Nongjrong bad ha kajuh ka por ka la pynkup burom kyrpang ïa ki arngut ki samla jong kane ka shnong kiba kynthup ïa u samla Misonwell Rangtong bad ïa ka samla Pamela Ryntong kiba la trei borbah ban kyntiew ïa ki kam jngohkai pyrthei ha ka shnong Nongjrong.
