Ai bor pura ha ki BOP ban ïada ïa ki paidbah khappud bad ki jaka pule ha khappud Assam : KSU

Shillong, Nohprah 07 : U President ka KSU, Bah Lambokstarwell Marngar ha ka sngi Balang u la kyntu ïa ka sorkar jylla ba ka dei ban ai bor pura ha ki Border Outpost (BOP) ban ai ka jingïada ïa ki paidbah ba sah ha khappud kumjuh ïa ki jaka puta jong ki ha shi lynter ka khappud bad ka Assam.
“Nga kyntu ïa ka sorkar jlla ba kan ai bor pura ïa ki BOP ba kin ïada ïa ki paidbah jongngi bad ruh ïa ka jaka puta namar ka sorkar Assam ka ai bor ha ki bor pahara jong ka ha ki jaka khappud,” u la ong haba kren ha ka jingïalang kynmaw burom ïa ka lyngkhuh sngi ïap u President barim ka KSU, Bah Bull N Lyngdoh hynne ka sngi.
Katei ka jingkren jong u, kadei hadien ba ka sorkar jylla ka la rai ban tei da ki BOP ha kylleng ki jaka ba don ki jingma hadien ba san ngut ki nongshong shnong ka Mukroh ki la kyllon ïap ha ka jingsiat ki pulit Assam ha ka 22tarik u Naiwieng mynta u snem.
Katkum ka jingong jong u, ki pulit Meghalaya ki la hap ban her krad ryngkat bad ki paidbah ha katei ka jingjia ha Mukroh namar la phah pahara ïa ki ha khappud khlem kano kano ka jingbthah ba tikna bad ruh da ka jingtieng ïoh shah pynshitom kylla lada ki leh ei ei ban ïada ïa ki paidbah.
U la ong ruh, “Kaei ka jingmut ban ai tiar ïaleh ïa ki ban ïada ïa ki paidbah hynrei ha kajuh ka por pat ki khang ba kim dei satia wat ban siat tang uwei u kylli.”
U ong ruh ba ka sorkar jylla kadei ban pyntikna ba baroh ki BOP ki la ïoh pura ïa ka jingbun briew ban ïada na kino kino ki jingwan kyntur pud biang jong ka Assam.
“Ka sorkar jylla kadei ban kyndit ba ka thong jong ka sorkar Assam hi ka long ban wanrah ïa ka jingsngew syier ha ki nongshong shnong jong ki khnang ba kin phet bad iehnoh ïa ki jaka puta,” u la bynrap biang.
Haba ïadei bad ka jingpynslem ban thaw ïa ka jingtohkit CBI ha katei ka jingjia ha Mukroh, utei u heh KSU u la ong,”Lada ka sorkar jylla ka kwah ban pynïoh ïa ka jingbishar kaba hok na bynta kitei ki longïing kiba duh ïa ki bahaïing ha sem ha Mukroh ba Langpih, kadei ban pyntikna ba kan don ka jingtohkit kaba khuid bad kaba shai khnang ba kito kiba donkti kin ym ïoh ban ïaid laitluid hynrei ban ngat ha ka jingshah pynshitom katkum ki kyndon ka aiñ.”
Utei u heh ka KSU u la pynpaw ruh ka jingsngewdiaw halor ka jingslem jong ka sorkar ban pyntreikam noh ïa ka Inner Line Permit ha ka jylla bad ruh ban ai jingithuh noh ïa ka Ktien Khasi bad Garo ha ka Khyrnit kaba Phra.
Nalorkata, u la kyntu ruh ïa ka sorkar pdeng ba kan kiar na kaba leh arsap haba ïadei bad ka jingkhot ïakren ïasuk bad ka HNLC.
Katei ka jingkren jong u ka wan hadien ba ka special court jong ka National Investigation Agency, Shillong kaba la khot hajir ïa ki nongïalam ka HNLC ha kapor ba ka jingïakren iasuk hapdeng ka sorkar bad katei ka kynhun ka dang iaid.