Ai bad ki sakhi sabut kiba biang lada lap ba leh thok ha ki eksam ba pynïaid ka MPSC

Shillong, Nohprah 16 : Ka Meghalaya Public Service Commission ka la pynshai halor ka jingmih khubor kaba khlem sangeh ryngkat ki jingkynthoh pyrshah ïa ka jingtreikam jong ka khlem kano kano ka sakhi sabut bad ong ba kane ka dei kaba la shu kynnoh da mano re da ka jingthmu ban pynjahburom.
Katkum ka kyrwoh la ong, ba khnang ban weng ïa ki jingartatien jong ki kyrtong ïakhun kam bad kumjuh ïa ki paidbah, ka Commission ka kwah ban pynshai ba ka jingpynheh shuh shuh ïa ki jaka thoh eksam kam bad ki jaka shabar ka Shillong bad Tura ka dei na ka bynta ban pynsuk ïa ki samla ïakhun kam kiba dei na ki distrik bad ki thain bapher bapher.
Shuh shuh la ong ruh ba ka MPSC ka ai kajuh ka jingbthah sha baroh ki nongpynïaid (venue supervisor) na ka bynta ka jingïaid beit ïaid ryntih ka jingthoh eksam. “Haba ïadei bad ka jingkynnoh ba pyndonkam tuh da ka jingïarap ki mobile phone, kajuh ka kyndon la pyntreikam na ka bynta baroh ki eksam ha baroh ki centre da ka jingkyrshan ki bor pynïaid distrik ryngkat ki pulit ban talasi ha man ki eksam.”
Shuh shuh la ong ruh ba ka Commission ka shimkhia ruh halor ka jingkynnoh ba don ka jingleh thok ha ki katto katne ki jaka thoh eksam bad kumta ka buh thong ban pynkhlain shuh shuh ïa ka rukom treikam khnang ba kum kita ki jingjia kin ym jia shuh nangne shakhmat. “Ka lah ban jia ba wat hapdeng ka jingpyrkhing kaba jur kaba la talasi da ki kor ki bor ha kum katei ka por lehse don pat kiba dang ïoh ban rah ïa ka mobile shapoh jaka thoh eksam.”
Kumta la ong ba da kaba shimkhia na katei ka jingjia, ka Commission ka la pynkylla lut ïa ki kyndon bad bthah ïa ki nongpynïaid eksam ban pyntreikam pyrkhing shuh shuh bad ban pyntip mardor lada dang lap ïa kiba leh thok khnang ban leh ïa kaba donkam.
Shuh shuh la ong ruh haba don kino kino ki jingkynnoh leh thok, la bthah ïa ki district magistrate ne ki deputy commissioner ban tohkit bniah. La ong ruh ba halor kane ka bynta, lah ban kdew ïa ka jingdon ki jaka thoh eksam palat ïa kawei, lada bun ki kamra ha kawei kawei ka jaka, khlem da ai ki jingbatai kiba bniah haba ïadei bad ka jaka thoh eksam lane ka kamra ba katno, kan long kaba eh ïano ïano ban pynshisha ïa ka jingkynnoh khamtam hadien ba la kut ka eksam.
“Hynrei la katta ruh, ka Commission ka la shimkhia ïa kane ka jingkynnoh bad bthah ban pyrkhing shuh shuh ka jingpeitngor. Nalorkane, ïa ki ID Card la ai sha baroh ki nongpeit ha kito ki eksam ryngkat bad ka serial number na ka bynta ban kham suk ban ithuh lada don kano kano ka jingujor.”
Nalorkata, la ong ruh ba ka MPSC ka treikam da kaba pyrkhing bha haba ïadei bad ki kot jingkylli da kaba pyntikna ba kan ym don satia ka jinglait tuh ki jingkylli. La ong ruh ba kito kiba kynnoh ba don ka jinglait tuh ki dei ban wanrah ryngkat bad ki sakhi khnang ba ka ain lah ban shim ïa kaba donkam.
“Ka Meghalaya Public Service Commission ka pynskhem ïa ka nongrim bad pyntip sha ki kyrtong ïakhun kam bad sha ka jylla ba ka da shimkhia tyngeh haba ïadei bad kane ka bynta. Kumta ki briew kiba kwah ban ai jingtip, ryngkat ki kam leh thok ba jia shisha ki lah ban ujor ryngkat ki roll no jong kito ki kyrtong ba leh (kaba don ha kato ka desk thoh eksam jong uto u kyrtong) ryngkat ka hall number bad ka jaka ba thoh eksam, ka kyrteng jong ka centre. Nalor kata ïa ka jingujor ïa kiba pynïaid eksam ki lah ban peit da kaba peit ïa ki ID number, ka kamra kaba ki dei ban peit, ka jaka bad ka kyrteng jong ka Centre bad ujor sha ki venue supervisor kiba dei peit mardor mar ïa dep ka eksam lane lyngba ka email sha ka – examinationcomplaints.mpsc@gmail.com, hapoh 7 sngi ba pynlong ïa ka eksam na ka bynta ki kam leh thok ha ki eksam na ka bynta ban tohkit bad ban leh ïa kaba donkam,” ong ka kyrwoh.
Shuh shuh la ong ruh ba kito kiba ujor ki dei ruh ban da ïathuh ruh shaphang ïalade ïa kaba yn buhrieh ïa ka kyrteng jong ki, khnang ba kane kan weng noh ïa kino kino ki jingujor kiba shu kwah pynjah burom. Ka kyrwoh ka ong ruh ba kino kino ki jingkynthoh kiba dei bad ai jingmut na ka liang ka Commission ka pdiang da kaba sngewbha naka bynta ban pyntikna ïa ka jingtreikam kaba paka haba ïadei bad eksam ïakhun kam.
Kane ka long katkum ka kyrwoh ba la phah da ka Meghalaya Public Service Commission.