Ai ba kane ka khristmas kan wanrah ka jingkylla bad ka suk ka saiñ haka jylla

Nongpoh, Nohprah 23: U MLA ka Mawhati u Bah Charles Marngar u la ai ka jingkhublei ba kyrpang sha ki paidbah ka Mawhati Constituency, ki nongshong shnong ka Ri-Bhoi bad ka jylla baroh kawei shuwa ban pdiang ïaka jingwan longbriew u khun jong u Blei u Jisu Khrist sha kane ka sla pyrthei, kumba ki khun khristan ha baroh kawei ka pyrthei ki lehkmen ban pdiang ïa kane ka sngi.
Haba kren sha ki lad pathai khubor naka liang u Bah Charles Marngar u la ai khublei khristmas ïa baroh naduh ki tymmen ki kro, ki longkmie ki longkpa, ki khun samla bad ki hep barit bad ai ba kane ka khristmas kan long kaba suk kaba kmen bad ha kajuh ka por u la shim ruh ka kabu ban ai khublei snem thymmai ba dap kyrhai ïa baroh ba ngin pdiang ïa kane ka khristmas bad snem thymmai da ka jingieid, ka jingsuk bad ka jingkmen.
Na ka liang u Bah Charles Marngar u la sot ruh naka ktien u Blei lyngba ka Gospel u Ioannis 3:16 kaba ong “Naba U Blei u la ieit katta katta ïa ka pyrthei katba u la aiti noh ïa la u khun ba la kha marwei, ba uei uei ruh uba ngeit ha u, un ym jot shuh, hynrei, un ïoh ka jingim bymjukut” bad lyngba kane ka dkhot naka Bible u Bah Charles u ong ba ka dei ka jingieid bah ka jong u Blei ba u la kloi ban phah ïala u khun ba marwei sha kane ka sla pyrthei ban pynim pat ïaki nongpop bad kiba la jot la rem.
Shuh shuh u la ong ruh ba lyngba ka jingwan jong ka khristmas ngin pynthymmai pat ïala ka jong ka mynsiem ban ieid iwei ïa iwei naduh na iing na sem, ka imlang ka sahlang bad hangtag kan sa wan ka jingkylla ba ka jylla jong ngi kan don hapdeng ka shongsuk shongsaiñ.