AHMEDABAD, Naiwieng 29: Ka jingkyrmen jong ka India ban ïoh rung sha ka lympung AFC Under-17 Asian Cup 2026 ka la shah ktah khyndiat hadien ba ka la mad ïa ka nam rem ha ka Lebanon da 0-2 ha EKA Arena ha Ahmedabad ha ka jingïalehkai kaba la long ha ka jan miet jong ka sngi Thohdieng.
Hadien ka jingjop da 3-1 kol ïa ka Chinese Taipei, ka India ka la mad ïa ka jingïakhun kaba jur bha na ka liang pyrshah, ka Lebanon, kaba la wanrah ïa ka jingïalehkai kaba kham khlaiñ bad ban pynpaw ïa ki jingduna ki nongïalehkai ba shadien jong ka India.
Ka Lebanon ka la pynkhih ïa ka kol kaba nyngkong ha ka minit kaba 26 lyngba u Antoine Assaf. Nangta ka la pynjlan ar shah ïa ka kol lamkhmat hadien 11 minit lyngba u Paul Maakaroun.
Ka miet ka la nang sniew shuh shuh ïa ka India ha kane ka jingïalehkai hadien ba u rangïalehkai pdeng u Thonggoumang Touthang u la ïoh ïa ka card red card hadien ka jingïakynad bad u Maakaroun, kaba la pynlong ïa u ban nym lah ban ïashim bynta ha ka jingïakhun kaba khatduh.
Wat hapdeng ka jingshah rem, hynrei ka kynhun jong u Bibiano Fernandes ka dang don ha ka jingïaknieh ban ïohrung bad kan ïakhun pyrshah ïa ka IR Iran kaba ïalam ha khliehduh jong ka Group ha ka jingïalehkai ‘do-or-die’ ha ka sngi U Blei.
Da kaba tip ba tang ka jingjop kan pynthikna ïa ka jingïoh rung sha kane ka lympung ha ka sien kaba 10. Ka Iran mynta ka don hakhlieh duh ha kane ka Group da kaba kamai hynñiew poiñ na ki lai tylli ki jingïakhun hadien ba ka la pynliem ïa ka Palestine kham hashwa, katba ka India ka la ïoh saw poiñ na ki lai tylli ki jingïakhun. Ka jingjop jong ka India kan pynlong ïa baroh ar tylli ki kynhun ban ïaryngkat da mar hynñiew poiñ, ha kaba ka India kan jam shaphrang halor ka nongrim jong ka resol kaba mih na ka jingïalehkai hapdeng jong ki lane ka head-to-head.
