Shillong, K’ Lyngkot 25: U Party Commander, D-Coy, Umsyiem BOP, BSF (EKH) u la phah ka jingujor ba ha ka miet jong ka 19 tarik mynta u bnai, ki shipai BSF ki la ïoh ban khang kdong ïa kawei ka kali kaba don u nombar ML-10D-5323 ba la ñiah da uwei uba kyrteng u Banistar Bamon 28 snem ka rta, ha ka jaka jong ka BP No. 1272/5-S, BOP Pyrdiwah, katba ka dangkit ïa ki 6 ngut ki nong Bangladeshi kiba kyrteng Taniya Akhtar 28 snem, Alpona Khatun 39 snem, Mahinur Akhtar 25 snem, Arifa Khatun 29 snem, Shamoli Das 21 snem bad Zoya Khan 24 snem, kine ki dang thmu ban leit sha Dawki ban leit jam noh sha ri Bangladesh na khappud India.
Shuh shuh ha kawei pat ka jingjia, u Party Commander, D-Coy, Umsyiem BOP, BSF (EKH) u la phah ka jingujor ba ha ka 20 tarik mynta u bnai ha ka por kumba 12.10 baje mynstep, ki shipai BSF ki la ïoh ban khang kdong sa kawei pat ka kali local taxi kaba don u nombar ML-05J-2060 ba la ñiah da u Jestar Mukhim ba la 30 snem ka rta ha ryngkat bad la ka kurim jong u ha ka jaka BP No. 1272/5-S, BOP Pyrdiwah, katba ka dang kit ïa 4 ngut ki nong Bangladeshi kiba kyrteng u Hussain Sheikh ba la 51 snem ka rta, Md. Siddique 23 snem, Hassan Bishes 28 snem bad Lipi Begum 45 snem ka rta kiba dang jam beaiñ na Bangladesh sha u pud u sam ka India.
