Banjur u nongïalam ka BJP ïa ka jingdonkam ban pynneh pynsah ïa ki hok, ki riti bad dustur tynrai

Shillong, Kyllalyngkot 25 : U Nongïalam ka BJP na Tura uba dei ruh u MDC u Bernard N Marak u la banjur ïa ka jingdonkam ban pynneh pynsah ïa ki hok, ki riti dustur tynrai kumba ka ri India ka rakhe ïa ka jingdap 75 snem ka jingrakhe ïa ka Republic Day.
“ Ka jingrakhe ïa ka Republic Day ka dei ka jingrakhe ban pynkynmaw ïa ka jingseng nongrim ïa ka Riti Synshar jongka ri bad na ka bynta ki Jaidbynriew rit paid ka dei ban pynneh pynsah ïa ki riti ki dustur tynrai jongki” ong u Bernard.
U la kren bynniaw ba wat la ka Riti Synshar jongka ri ka la ai ïa kane ka kyrdan ba kyrpang ïa ki jaidbynriew Riewlum ka Meghalaya bad kiwei kiwei ki jylla kane ka thaiñ hynrei haduh mynta kim pat ïoh satia ïa kita ki hok tynrai ba ki dei ban ïoh.
Ki subjek pule naduh kyrdan Primary haduh Degree ki khlem hikai wat tang khyndiat ruh ïa kita ki hok tynrai ba kum ki jaidbynriew riewlum ki dei ban pynneh pynsah. U la ong donkam ban ai ka jinghikai kyrpang halor ka Sixth Schedule jongka Riti synshar ka ri namar dei lyngba kane lah ban tip ïa kiei ki lad jingïada na ka bynta ki paid Riewlum rit paid.
U Marak u ban jur ïa ka jingdonkam ban ïada ïa ka khyndew ka shyiap, ka ktien ka thylliej, ka rukom bam, rukom riam tynrai, ka rukom im tynrai, ka niam bad ter ter na ka jingshah thombor ha kiwei pat ki jaidbynriew. Namar kine ki dei ki jinglong ba kyrpang jong ki jaidbynriew riewlum rit paid.