Rung ka Sohkhyllam, ka Se Lajong FC, ka MLP FT bad ka Warsanlyngdoh sha ka semifinal Rowell Lyngdoh Memorial FT

By Mawphor Editor On Jan 26, 2026

Mawkyrwat, K’Lyngkot 25 : Ka lympung ïalehkai phutbol Rowell Lyngdoh Memorial Football Tournament 2025-26 ba la pynïaid da ka Mawlangwir Sports Club mynta ka la jam sha ka semifinal hadien ba ki saw tylli ki kynhun, kita, ka Sohkhyllam Sports Club, ka Se-Lajong Football Club, ka MLP Football Team bad ka Warsanlyngdoh Sports & Cultural Club, ki la lah ban jop ka ka wat jong ka quarterfinal.
Ha ka quarterfinal kaba nyngkong, ka Sohkhyllam Sports Club ka la lah ban pynliem noh ïa ka Wahkaji S&CC lyngba ka tie breaker. Ha kane ka jingïalehkai, la ban thep ïa kine ki lai tylli ki kol lyngba u B. Lyngkhoi ha ka minit kaba 8, u S. Shangpliang ha ka minit kaba 20 bad u M. Marweiñ ha ka minit kaba 85.
Shuh shuh, ha ka quarterfinal kaba lai, ka MLP FT ka la jop pyrshah ïa ka Uprising FC da 4 – 3. Ha ka kyllastep, ka MLP ka la ïoh ban thep kol nyngkong ha ka minit kaba 16 lyngba u K. Sohlang. Ha ka minit ka 32, ka Uprising ka la ïoh ban pynïakhaid lyngba ka kol u I. Nonglyer.
Ynda la poi ha ka kyllamiet pat, ka MLP ka la ïoh biang ban pynkhih jar lyngba u Arkwis Wanniang ha ka minit kaba 52. Ha ka minit kaba 58 pat, u Arrowstar Wanniang jong ka MLP u la ïoh ban thep ïa ka kol kaba lai. Ka MLP ka la ñion tyngeh ïa ka Uprising bad ka la ïoh ban thep sa ïa ka kol kaba saw ha ka minit kaba 81 lyngba u S. Thongni. Watla hapdeng ka jingshah ñion, ka Uprising ka la iakhun tyngeh ban pynphai ïa kine ki kol bad u I. Nonglyer u la ïoh ban thep ar tylli ki kol ha ka minit kaba 85 bad 86 hynrei ka Uprising ka khlem shym la lah shuh ban pynphai ïa baroh ki kol haduh kaba kut jong ka jingïalehkai.
Katba ha ka quarterfinal kaba khatduh pat, ka Warsanlyngdoh S&CC ka la pynliem noh ïa ka Sakwang SC lyngba ka tie breaker. Ha ka jingïalehkai baroh tylli ki kynhun ki la ïa khun tyngeh ban ïoh thep kol hynrei ki khlem shym la lah ban pynkhih jar haduh kaba kut jong ka jingïalehkai. Kumta u referee u la hap ban pynïaleh noh da ka tie breaker ha kaba ka Warsanlyngdoh S&CC ka la jop noh 3 la 2.
Lyngba kine ki jingjop ha ka quarterfinal, kitei ki saw tylli ki kynhun ki la ïoh ban rung noh sha ka wat jong ka semifinal.
Kumta ka Mawlangwir SC ka pyntip paidbah ba ki jingïalehkai semifinal ki long hapdeng ka Sohkhyllam Sports Club bad ka Se-Lajong Football Club ha ka 26 tarik u Kyllalyngkot, 2026 (Sngi Nyngkong) ha ka por shi baje shiteng nohphaisngi, bad hapdeng ka MLP Football Team bad ka Warsanlyngdoh Sports & Cultural Club ha ka 30 tarik u Kyllalyngkot, 2026 (Sngi Thohdieng), ha ka por shi baje shiteng nohphaisngi, ha Rowell Lyngdoh Stadium, Saitsnad, Mawlangwir, South West Khasi Hills District.
Namarkata, ka Mawlangwir SC ka khot ka wer ïa baroh ki riewieit phutbol jong ka dong ka thaiñ hi baroh kawei ban wan ban sakhi ïa kine ki jingïalehkai semifinal ha kitei ki tarik bad ban wan ban ai mynsiem ïa kine ki kynhun ki ban ïa knieh ban rung sha ka phainal.