Jowai, K’lyngkot 25: Ka proseshon Iukharist kaba shisien shisnem ka Parish Nangbah kala long hynne ka sngi U Blei 25 tarik ha Nangbah ha kaba da ki hajar ngut ki paidriewngeit ki la ïawan shim bynta ha kane ka proseshon Iukharist bad u Most Rev. Ferdinand Dkhar dd, Bishop ka jylla Niam Jowai u long u kongsan ha baroh ki jinglehniam.
Ha ka por shiphew baje mynstep la don ka jingkñia Mass Iukharist bakhuid kaba la lamkhmat da u Bishop Ferdinand ha ryngkat ka jingïasynranlang ki Lyngdohsohblei kiba la ïawan shim bynta ha kane ka Proseshon kaba shisien shisnem jong ka Parish Nangbah. Ha kane ka sngi la nang pynphuh pynphieng ïa ka jinglehniam jong ka jingkñia Mass Iukhrist la lamkhmat ïa u Bishop bad ïa ki Lyngdohsohblei ban kiew sha ka Duwan ka Dupat da ka jingshadtynrai ba la shad da ka kynhun ki riewngeit na ka Balang Mupliang.
U Bishop Ferdinand Dkhar ha ka kren sneng kren kraw ïa ki paidriewngeit, u pynpaw ïa ka jingkmen ka bakhraw ban ïohi ïa ka mynsiem shongshit jong ki paidriewngeit kiba ladap hi smam ïa ka Madan ïingskul Parish. Haba kren ha kane ka sngi, u Bishop u ong ba kane ka snem ka dei ka snem jong ki riewngeit bad kane ka jingwan shongshit jong ki riewngeit sha ki jinglehniam bad sha ki Proseshon ka ïahapdur bha bad kane ka ka snem jong ki riewngeit bad u kyntu da kaba ong “To ai ba kane ka mynsiem shongshit ki paidriewngeit ban ïabeh sha jingïaseng proseshon Iukharist bad sha ki jinglehniam kan nangpynshongshit shuh shuh ha ki por ki ban dangwan”.
Ha ka por shibaje nohphai-sngi la pynlong ïa ka jingïaid proseshon Iukharist kaba la lamkhmat da ki Nongshad na ka kynhun Balang Moopasi bad ka Cathedral Band Archdiocese Shillong kaba lyngkot hapoh ka shnong Nangbah da kaba ïaid lyngba ka kyntoit shnong Lumshor, Mission Compound, Iawmusiang bad wanphai sha Madan ïingskul Parish.
Ha shwa ban ïoh ïa ka jingkyrkhu pynwai da ka Sakrament bakhuid tam jong ka Duwan, la ïoh ïa ka jingkren sneng kren kraw kaba sngewtynnat da u Sohblei Rev. Father Lakhon Tre, halor ki kyntien jong u Syiem Soul ïa u David “To U Trai Un don ryngkat bad phi” bad ïa kine ki kyntien u Lyngdohsohblei jong ka Balang Katholik naduh ba sdang ka Jingkñia Mass u ong ïa ki paidriewngeit “U Trai Un don ryngkat bad phi bad ka jubab na ki paidriewngeit pat Ryngkat bad phi ruh”.
Nangta u Sohblei Lakhon Tre u ong ngi long kiba donbok ba U Jisu U don ryngkat bad ngi haduh bawai ka pyrthei bad kane ka jingdon jong u Jisu haduh ba wai ka pyrthei naba U Jisu u shongrieh ha ka Iukharist bakhuid ha ka dur jong jong u Kpu bad ka Waiñ. La pynwai ïa kane ka sngi da ka jingkyrkhu ba kyrpang da ka Sakrament bakhuid tam ka Duwan na kti u Lyngdohsad, Most. Rev. Ferdinand Dkhar, Bishop ka Jylla niam Jowai.
Ha shwa ban sdang ïa ka jingkñia Mass bakhuid la kyrkhu ïa u Mot Baje uba don hakhmat ka ïingmane jong ka Parist da u Most Rev. Ferdinand Dkhar, Bishop ka jylla niam Jowai, ha ka jingïadonlang u Rev. Fr. Simeon Sungoh, Fr. Desmon Nongtdu, Parish Priest, Parish Nangbah bad kiwei ki de ki phadar bad riew khmat jong ka Balang.
