Santosh Trophy 2025-26: Mynta yn sdang ka M’laya ïa ka jingïakhun ba nyngkong pyrshah ïa ka Odisha

Shillong, Kyllalyngkot 21: Ka Meghalaya kan sdang ïa ka jingïakhun ba nyngkong ha ka wat ïakhun ba khatduh (final Round) jong ka 79th Senior Men’s National Football Championship na ka bynta ka Santosh Trophy 2025-26 pyrshah ïa ka Odisha ha kane ka sngi Palei.
Hadien bun sngi jong ka jingpynkhreh kaba jur bha, ka kynhun ïalehkai jong ka jylla kan kyrmen ban sdang ïa ka jingïaid lynti jong ka ha ka rukom kaba bha, bad kata ka long ban jop ïa ka Odisha. Kane ka jingïalehkai kan sdang ha ka por 2 baje janmiet ha Silapathar Football Stadium ha Assam bad yn sa pyni live ha ka FIFA+.
Lah ban kdew ba ka Group B ka dei thup kaba khlaiñ tam namar ba ka don ïa ki saw tylli ki lahduh barim bad kawei ka kynhun kaba la poi kyrdan ba ar (runner-up). Ka Punjab ka la jop ïa ka Santosh Trophy haduh 8 sien bad ka la wan kyrdan ba-ar haduh 8 sien. Ka Kerala ka bat ïa ka rekod nam lahduh haduh hynñiew sien bad ka la wan kyrdan ba-ar haduh 9 sien. Ka Services ka la jop hynñiew sien ïa ka nam lahduh bad ka la wan kyrdan ba ar san sien. Ka Railways ka la jop lai sien bad ka la wan ha ka kyrdan ba ar hynriew sien. Ka Meghalaya ka la wan ba-ar shisien, katba ka Odisha ka dei tang ma ka ka kynhun ka bym pat ju poi shaduh ka phainal.
Ka jingïaid lynti kaba bha tam jong ka Meghalaya ka long ha u snem 2022-23 ha kaba ka la shah pynliem noh ha ka Karnataka ha ka phainal. U coach ha katei ka por u dei u bah Khlain Pyrkhat Syiemlieh bad mynta u snem ruh un dang bteng ban long coach ïa ka kynhun.
Lah ban ong ba ka kynhun ïalehkai jong ka jylla, kam shym la ïoh ïa ka jingïoh rung kaba suk lyngba ka wat ïakhun kaba nyngkong (preliminary stage) ha u bnai ba la dep, namar ba ki la shah rem noh ha ka Sikkim da 2-1 kol shuwa ban pynliem ïa ka Arunachal Pradesh da kajuh ka jingkheiñ (2-1). Hynrei kane ka la long kat ban biang ban pynlong ïa ka Meghalaya ban jam shakhmat katkum ki jingkheiñ jong ki kol ba la thep. Katba ka por pynkhreh shuwa ka wat ïakhun ba nyngkong ka long kaba duna, ka Meghalaya ka la ïoh katto katne taïew ban pynkhreh ïa ka final round.
Kane ka por kilanmet kaba slem ka la ailad ïa ka Meghalaya ban pynbeit sa kawei pat ka jingeh – kata ka jingbym lah ban ïalehkai katto katne ngut ki nongïalehkai namar ki jingkular jong ki klob bad kiwei kiwei ki daw. Ki nongtrei (support staff), ryngkat ka jingkyrshan jong kiwei pat ki dkhot jong ka Meghalaya Football Association, ki la lah ban jied ïa ka kynhun kaba ïahap bad kaba khlaiñ hynrei ka jingtynjuh kan long kaba jur bha namar ka kynhun kan hap ban aireng pyrshah ïa ki jylla kiba khlaiñbor ha ka Group.
Da tang saw tylli ki kynhun na kawei pa kawei ka Group kin ïohrung sha ka Quarterfinal, ka round robin stage, kan long ka jingthmu ba nyngkong eh jong u bah Khlain Pyrkhat Syiemlieh bad ka kynhun ki rangïalehkai jong u. Da ka jingkyrshan kaba pura jong ka jylla, ka kynhun kan kyrmen ban buh ïa ka dak kaba bha ynda kin ïakhun pyrshah ïa ka Odisha ha kane ka sngi Palei.