Sha u myntri sorkar kmie pynsngew u Bah Sanbor ba slem pyndep ïa ka surok Umshyrpi sha Sadew

Shillong, K’Lyngkot 19: U MLA ka BJP uba dei ruh u Myntri sorkar u Bah Sanbor Shullai ha ryngkat bad u State President ka party u Rikman Momin ryngkat bad kiwei de ki nongïalam ki la kynduh ïa u Nitin Gadkari u myntri sorkar kmie ba peit ïa ka road and transport ban pynsngew sha u halor ka jingslem ban pyndep ïa ka surok 4 lane na Umshyrpi shaduh Sadew.
Ha kane ka jingïa kynduh mynta ka sngi Nyngkong kila pynsngew ruh ha kaba ïadei bad ki jingeh jong ki nala ha ka thain Shillong Cantonment ha kaba la shu sahkut khlem da peit da ka NHIDCL bad ruh kila pynpaw sha u myntri ïa ka jingdon kam ba kyrkieh ban don ka fly over na Barik shaduh ka jaka ïeng taksi Jhalupara ban pyllait na ka jingdheng kali ha kylleng ki jaka.
Na ka liang u union minister u la ai ka jingkular sha ki ba un sa rah ïa kane ka mat bad ka defence ministry na ka bynta ban pan jaka ban ai sha NHIDCL ban shna ïa ka project flyover.
U myntri sorkar pdeng u la ai jingmut sha ki ban thaw noh da ka infrastructure development committee na ka bynta ban ioh pyndep kloi ïa ki flyover bad na ka liang jong u Bah Sanbor u la ai khublei halor kane ka jingshim khia jong u.